મધ્ય પ્રદેશમાં RSS કાર્યાલયમાં મળ્યો પિન બોમ્બ, અડધી રાત્રે તપાસ માટે પહોંચી ટીમ

RSS Office In Madhya Pradesh: મધ્ય પ્રદેશના ભીંડના રહેણાંક વિસ્તાર હનુમાન બાજરિયામાં સ્થિત રાષ્ટ્રીય સ્વયં સંઘ (RSS)ની ઓફિસમાંથી પિન બોમ્બ મળી આવતા ખળભળાટ મચી ગયો હતો.

પ્રતીકાત્મક તસવીર

RSS Office In Madhya Pradesh:  શનિવારે રાત્રે મધ્ય પ્રદેશના ભીંડના રહેણાંક વિસ્તાર હનુમાન બાજરિયામાં સ્થિત રાષ્ટ્રીય સ્વયં સંઘ (RSS)ની ઓફિસમાંથી પિન બોમ્બ મળી આવતા ખળભળાટ મચી ગયો હતો. આ બોમ્બ ગ્રેનેડ બોમ્બ જેવો દેખાય છે. રાત્રે લગભગ 12 વાગે ઓફિસની સંભાળ રાખતા સ્વયંસેવક રામ મોહનની સૂચના પર એસપી અસિત યાદવ ટીમ સાથે ઘટનાસ્થળે પહોંચ્યા અને બોમ્બની તપાસ શરૂ કરી. અધિકારીઓએ બોમ્બને પોતાના કબજામાં લઈ લીધો છે.

જણાવવામાં આવી રહ્યું છે કે સ્વયંસેવક રામ મોહનને આ બોમ્બ શુક્રવારે સાંજે ઓફિસ પરિસરમાં ધ્વજ ફરકાવવાની જગ્યાએથી મળ્યો હતો. બાળકો તેની સાથે રમતા હતા અને જ્યારે તેઓએ તેને જોયું તો તેઓએ તેને ઉપાડીને દૂર રાખ્યું. શનિવારે રાત્રે જ્યારે તેણે તેને એક વ્યક્તિને બતાવ્યો તો તેણે તેને બોમ્બ ગણાવ્યો, ત્યારબાદ પોલીસને જાણ કરવામાં આવી. માહિતી મળતાં જ બીજેપી ધારાસભ્ય નરેન્દ્ર સિંહ કુશાહ, એસપી અસિત યાદવ, ટીઆઈ કોતવાલી પ્રવીણ ચૌહાણ ડોગ સ્કવોડ સાથે આરએસએસ ઓફિસ પહોંચ્યા. પોલીસે બોમ્બ કબજે કર્યો છે.

પોલીસના જણાવ્યા અનુસાર બોમ્બ ઘણો જૂનો હોવાનું કહેવાય છે. એસપીએ જણાવ્યું કે થોડા દિવસો પહેલા આરએસએસ ઓફિસમાં માટી ભરાઈ ગઈ હતી. આ માટી ડીડી ગામ નજીક કુંવરી નદીના કોતરોમાંથી લાવવામાં આવી હતી. લગભગ 30 વર્ષ પહેલા અહીં ફાયરિંગ રેન્જ વિસ્તાર હતો. આવી સ્થિતિમાં આ બોમ્બ તે સમયે માટીમાં દાટી દેવામાં આવ્યો હોવાની સંભાવના છે અને હવે તે માટીની સાથે આ ઓફિસમાં પણ આવી ગયો છે. જો કે આ મામલે તપાસ કરવામાં આવી રહી છે.