હિન્દુ છોકરી અને મુસ્લિમ છોકરાની લવ સ્ટોરીમાં ૧૮ કૉલેજ સ્ટુડન્ટ્સ સસ્પેન્ડ થયા

મૅન્ગલોરમાં સેન્ટ જોસેફ એન્જિનિયરિંગ કૉલેજના ચાર સ્ટુડન્ટ્સને બૉલીવુડ સૉન્ગ પર બુરખો પહેરીને ડાન્સ કરવા બદલ સસ્પેન્ડ કરવામાં આવ્યા હતા

પ્રતીકાત્મક તસવીર (સૌજન્ય : આઇસ્ટૉક)

મૅન્ગલોર : મૅન્ગલોરમાં એક પ્રાઇવેટ કૉલેજે હિન્દુ છોકરી અને મુસ્લિમ છોકરા વચ્ચેના લવ અફેરના મામલે ૧૮ સ્ટુડન્ટ્સને સસ્પેન્ડ કર્યા હતા. આ કૉલેજના મૅનેજમેન્ટને ​આ હિન્દુ છોકરી અને મુસ્લિમ છોકરા વચ્ચેના લવ અફેર વિશે ખબર પડી. મૅનેજમેન્ટે તેમને ચેતવણી આપીને તેમના પેરન્ટ્સની હાજરીમાં તેમને જવા દીધાં હતાં. 

એ જ કૉલેજના કેટલાક હિન્દુ છોકરાઓને ખબર પડી કે આ કપલ હજી રિલેશનશિપમાં છે. તેમણે બુધવારે યોજાયેલા કૉલેજના એક પ્રોગ્રામમાં આ મુસ્લિમ છોકરાને ધમકી આપી હતી. એવામાં મુસ્લિમ કમ્યુનિટીના સ્ટુડન્ટ્સ આ મુસ્લિમ છોકરાના બચાવમાં આવી ગયા એને લીધે બન્ને ગ્રુપ વચ્ચે ઘર્ષણ થયું હતું. 

આ ઘટનાના પગલે કૉલેજ મૅનેજમેન્ટે મુસ્લિમ છોકરાને સપોર્ટ કરનારા સહિત કુલ ૧૮ સ્ટુડન્ટ્સને સસ્પેન્ડ કરી દીધા હતા. જોકે આવતા વર્ષે માર્ચમાં યોજાનારી એક્ઝામ આપવા દેવાની તેમને છૂટ અપાઈ હતી. આ સ્ટુડન્ટ્સને ઑનલાઇન ક્લાસની સુવિધા પણ પૂરી પાડવામાં આવશે. માત્ર કૉલેજમાં તેમના આવવા પર પ્રતિબંધ મૂકવામાં આવ્યો છે. 

આ પહેલાં મૅન્ગલોરમાં સેન્ટ જોસેફ એન્જિનિયરિંગ કૉલેજના ચાર સ્ટુડન્ટ્સને બૉલીવુડ સૉન્ગ પર બુરખો પહેરીને ડાન્સ કરવા બદલ સસ્પેન્ડ કરવામાં આવ્યા હતા. આ ચાર સ્ટુડન્ટ્સના ડાન્સનો વિડિયો સોશ્યલ મીડિયા પર વાઇરલ થયો હતો.