11 December, 2023 05:00 PM IST | New Delhi | Gujarati Mid-day Online Correspondent
મહુઆ મોઇત્રાની ફાઇલ તસવીર
TMC નેતા મહુઆ મોઇત્રા (Mahua Moitra)એ લોકસભા (Lok Sabha)ની સદસ્યતા રદ કરવાના નિર્ણયને સુપ્રીમ કોર્ટ (Supreme Court)માં પડકાર્યો છે. કેશ ફોર ક્વેરી કેસમાં એથિક્સ કમિટીની ભલામણ બાદ શુક્રવારે મહુઆની સંસદ સભ્યપદ રદ કરવામાં આવી હતી. વાસ્તવમાં મહુઆ પર સંસદમાં પૈસા લેવા અને પ્રશ્નો પૂછવાનો આરોપ હતો. મહુઆ પર સંસદ લોગીન આઈડી અને પાસવર્ડ તેના મિત્ર હિરાનંદાની સાથે શેર કરવાનો પણ આરોપ હતો. એથિક્સ કમિટીને આ આરોપો સાચા હોવાનું જણાયું હતું.
સંસદમાં રજૂ કરાયેલા આ રિપોર્ટમાં મહુઆ સામેના આરોપોને ગંભીર ગણાવીને કાર્યવાહીની માગ કરવામાં આવી હતી. તેમ જ સંસદ સભ્યપદ રદ કરવાની માગણી કરી હતી. આ અહેવાલ પર ચર્ચા કર્યા પછી, તે અવાજ મત દ્વારા પસાર કરવામાં આવ્યો હતો. સ્પીકર ઓમ બિરલાએ કહ્યું હતું કે, આ ગૃહ સમિતિના નિષ્કર્ષને સ્વીકારે છે કે સાંસદ મહુઆ મોઇત્રાનું વર્તન અનૈતિક અને સાંસદ માટે અયોગ્ય હતું. તેથી તેમના માટે સાંસદ તરીકે ચાલુ રહેવું યોગ્ય નથી.
શું છે મામલો?
આ સમગ્ર મામલો બીજેપી (BJP) સાંસદ નિશિકાંત દુબેના આરોપોથી શરૂ થયો હતો. તાજેતરમાં જ નિશિકાંત દુબેએ ટીએમસીના મહુઆ મોઇત્રા પર સંસદમાં પ્રશ્નો પૂછવા માટે રિયલ એસ્ટેટ બિઝનેસમેન હિરાનંદાની પાસેથી લાંચ લેવાનો આરોપ લગાવ્યો હતો. નિશિકાંત દુબેએ મહુઆના પૂર્વ મિત્ર જય અનંત દેહાદરાયની ફરિયાદના આધારે આ આરોપો લગાવ્યા હતા. નિશિકાંતની ફરિયાદ પર લોકસભા સ્પીકર ઓમ બિરલાએ એક સમિતિની રચના કરી હતી. બિરલાને લખેલા પત્રમાં નિશિકાંત દુબેએ ગંભીર `વિશેષાધિકારનો ભંગ` અને `ગૃહની અવમાનના`ના મામલાને વર્ણવ્યો હતો.
સમિતિએ મહુઆ મોઇત્રા, નિશિકાંત દુબે સહિત ઘણા લોકોના નિવેદનો નોંધ્યા હતા. વિનોદ કુમાર સોનકરની આગેવાની હેઠળની સમિતિએ 9 નવેમ્બરે મળેલી બેઠકમાં `કેશ-ફોર-ક્વેરી`ના આરોપમાં મહુઆ મોઇત્રાની લોકસભાની સદસ્યતા રદ કરવાની ભલામણ કરતો અહેવાલ તૈયાર કર્યો હતો. સમિતિના છ સભ્યોએ અહેવાલની તરફેણમાં મતદાન કર્યું હતું. તેમાં કૉંગ્રેસના સાંસદ પ્રનીત કૌરનો પણ સમાવેશ થાય છે, જેમને અગાઉ પાર્ટીમાંથી સસ્પેન્ડ કરવામાં આવ્યા હતા.
મહુઆ સંસદમાંથી આઉટ, બોલવાની તક કેમ ન મળી?
કૅશ અને ગિફ્ટ્સ લઈને સંસદમાં સવાલો પૂછવાના મામલે ખૂબ જ વિવાદ બાદ આખરે તૃણમૂલ કૉન્ગ્રેસનાં લીડર મહુઆ મોઇત્રાની ગઈ કાલે લોકસભામાંથી હકાલપટ્ટી કરવામાં આવી હતી. સંસદમાં એક બિઝનેસમૅનના હિતમાં સવાલો પૂછવા માટે તેની પાસેથી કૅશ અને ગિફ્ટ્સ લેવા બદલ તેને દોષી ગણાવતાં એથિક્સ કમિટીના રિપોર્ટને લોકસભાએ પસાર કર્યો હતો. આ કમિટીના રિપોર્ટ પર ઉગ્ર વાતચીત દરમ્યાન મોઇત્રાને બોલવાની છૂટ નહોતી આપવામાં આવી. સંસદીય બાબતોના પ્રધાન પ્રહ્લાદ જોશીએ તૃણમૂલ કૉંગ્રેસનાં આ લીડરની હકાલપટ્ટી કરવા માટેની દરખાસ્ત રજૂ કરી હતી, જેને ધ્વનિમતથી પસાર કરવામાં આવી હતી.