યુપીમાં ટ્રકની ટક્કરમાં દાદા-પૌત્રનું મોત, છ વર્ષના બાળકને બે કિલોમીટર સુધી ઘસડવામાં આવ્યું

ઉત્તર પ્રદેશના મહોબામાં ટક્કર મારીને વાહનની નીચે ઘસડવાનો એક ચોંકાવનારો કિસ્સો બહાર આવ્યો છે.

પ્રતીકાત્મક તસવીર

મહોબાઃ ઉત્તર પ્રદેશના મહોબામાં ટક્કર મારીને વાહનની નીચે ઘસડવાનો એક ચોંકાવનારો કિસ્સો બહાર આવ્યો છે. અહીં શનિવારે સાંજે એક ટ્રકચાલકે છ વર્ષના એક બાળકને બેથી વધુ કિલોમીટર સુધી ટ્રકની નીચે ઘસડ્યું હતું, જેને કારણે આ બાળકનું મોત થયું હતું. આ અકસ્માતમાં બાળકના દાદાનું પણ મોત થયું હતું. 
પોલીસે જણાવ્યું હતું કે ૬૭ વર્ષના ઉદિત નારાયણ ચનસોરિયા અને તેમનો પૌત્ર સાત્વિક માર્કેટમાં જઈ રહ્યા હતા. એ સમયે ખૂબ જ સ્પીડમાં આવી રહેલી એક ડમ્પર ટ્રકે તેમના સ્કૂટરને ટક્કર મારી હતી. ટક્કરથી ઉદિત દૂર ફંગોળાઈ ગયા અને ત્યાં જ તેમનું મોત થયું હતું. જોકે ટ્રકે સાત્વિક અને ટૂ-વ્હીલરને બેથી વધુ કિલોમીટર સુધી ઘસડ્યાં હતાં. કાનપુર-સાગર હાઇવે એનએએચ-૮૬ પર આ ઘટના બની હતી. 
આ ઘટનાનો વિડિયો ગઈ કાલે સોશ્યલ મીડિયા પર વાઇરલ થયો હતો. જેમાં જોવા મળ્યું હતું કે આ ટ્રકની પાસેથી પસાર થતા અનેક બાઇકચાલકોએ ટ્રકના ડ્રાઇવરને અલર્ટ કરવાની કોશિશ કરી હતી. 
લોકોએ રસ્તા પર પથ્થરો ફેંક્યા બાદ આખરે ટ્રક રોકાઈ હતી. રોષે ભરાયેલા સ્થાનિક લોકોએ આ ટ્રકના ડ્રાઇવરને માર માર્યો હતો. પોલીસે ટ્રકને જપ્ત કરી છે અને એના ડ્રાઇવરને કસ્ટડીમાં લીધો છે.