એક હાથ વિનાની વ્યક્તિનું કામ સરળ કરવા માટે કૅમ્બ્રિજ યુનિવર્સિટીએ ‘ત્રીજો અંગૂઠો’ બનાવ્યો

આ થમ પહેરનારી વ્યક્તિ એક હાથેથી બૉટલ ખોલવી, ગ્લાસ પકડવો કે ફળની છાલ કાઢવા જેવાં કામ કરી શકશે.

કૅમ્બ્રિજ યુનિવર્સિટીએ ‘ત્રીજો અંગૂઠો’ બનાવ્યો

આર્ટિફિશ્યલ ઇન્ટેલિજન્સ અને રોબોટિક્સ માણસનું રોજબરોજનું કામ સરળ બનાવી રહ્યા છે. કૅમ્બ્રિજ યુનિવર્સિટીએ તાજેતરમાં આ જ હેતુથી રોબોટિક 3D-પ્રિન્ટેડ થમ એટલે કે ‘ત્રીજો અંગૂઠો’ બનાવ્યો છે. આ અંગૂઠો એક હાથેથી કરવામાં આવતા કામમાં મદદરૂપ બનશે. ખાસ કરીને આ પ્રોડક્ટ એવા લોકોને મદદ કરશે જેમણે એક હાથ ગુમાવ્યો હોય અને રોજિંદાં કામ કરવામાં મુશ્કેલી થતી હોય. યુનિવર્સિટીએ આ અંગૂઠાને ‘થર્ડ થમ’ નામ આપ્યું છે. ‘થર્ડ થમ’માં રહેલા સ્પેશ્યલ સેન્સરથી એને કન્ટ્રોલ કરી શકાય છે. આ થમ પહેરનારી વ્યક્તિ એક હાથેથી બૉટલ ખોલવી, ગ્લાસ પકડવો કે ફળની છાલ કાઢવા જેવાં કામ કરી શકશે. થર્ડ થમની મૂવમેન્ટ જે-તે યુઝર પર આધારિત હોય છે. યુઝર સેન્સર પર જેટલું પ્રેશર આપે એ મુજબ આ થમ કામ કરશે. જેમ-જેમ દબાણ ઘટાડવામાં આવે તેમ આ ‘થર્ડ થમ’ નૅચરલ સ્થિતિમાં આવી જશે. સંશોધકો આ પ્રોડક્ટને બનેએટલું સિમ્પલ રાખવા માગે છે જેથી લોકો જલદી એનો ઉપયોગ કરતાં શીખી જાય.