ઍર ઇન્ડિયા એક્સપ્રેસના સ્ટાફ પર મહિલાએ એકાએક કર્યો હુમલો, ઍરપોર્ટ પર બની ઘટના

ઍર ઈન્ડિયા એક્સપ્રેસ (Air India Express)ના પ્રવક્તાએ માહિતી આપી છે કે 1 સપ્ટેમ્બરે મુંબઈ ઍરપોર્ટ પર ગ્રાઉન્ડ ઑપરેશન પાર્ટનરના સ્ટાફ મેમ્બર સાથે એક મુસાફરે ગેરવર્તન કર્યું હતું

પ્રતીકાત્મક તસવીર

ભારતના વિવિધ રાજ્યોમાં ઍરપોર્ટ પર અરાજકતા હવે સામાન્ય બાબત બની ગઈ છે. ઘણી વખત ઍરપોર્ટ કર્મચારીઓ અને મુસાફરો વચ્ચે ઝઘડાના અહેવાલો પણ આવે છે. આવો જ એક કિસ્સો હવે મુંબઈ ઍરપોર્ટ પરથી પણ સામે આવ્યો છે. અહીં એક મહિલા પેસેન્જરે ઍર ઈન્ડિયા એક્સપ્રેસ (Air India Express)ની મહિલા કર્મચારી પર હુમલો કર્યો છે. ઘટના બાદ મહિલાને પોલીસને હવાલે કરી દેવામાં આવી છે. આવો જાણીએ આ સમગ્ર ઘટના વિશે.

શું છે સમગ્ર ઘટના?

ઍર ઈન્ડિયા એક્સપ્રેસ (Air India Express)ના પ્રવક્તાએ માહિતી આપી છે કે 1 સપ્ટેમ્બરે મુંબઈ ઍરપોર્ટ પર ગ્રાઉન્ડ ઑપરેશન પાર્ટનરના સ્ટાફ મેમ્બર સાથે એક મુસાફરે ગેરવર્તન કર્યું હતું. ડ્યુટી મેનેજરે તાત્કાલિક સીઆઈએસએફને ઘટના અંગે જાણ કરી હતી અને જરૂરી કાર્યવાહી મુજબ મુસાફરને પોલીસને સોંપવામાં આવ્યો હતો.

મુસાફરો અને કર્મચારીઓ બંને મહિલાઓ

પીટીઆઈએ સૂત્રોને ટાંકીને જણાવ્યું હતું કે, મુંબઈ ઍરપોર્ટ પર ઍર ઈન્ડિયા એક્સપ્રેસ (Air India Express) કાઉન્ટર પર એક મહિલા પેસેન્જરે મહિલા કર્મચારી પર હુમલો કર્યો છે. આ પછી મહિલા મુસાફરને પોલીસને હવાલે કરી દેવામાં આવી છે. આ ઘટના રવિવારે બની હતી. સૂત્રએ માહિતી આપી છે કે મુંબઈ ઍરપોર્ટ પરની આ ઘટનામાં સામેલ મુસાફરો અને કર્મચારીઓ બંને મહિલાઓ હતા.

ઝીરો ટોલરન્સ પૉલિસી – ઍર ઈન્ડિયા એક્સપ્રેસ

એર ઈન્ડિયા એક્સપ્રેસના પ્રવક્તાએ જણાવ્યું હતું કે, ગ્રાઉન્ડ ઑપરેશન પાર્ટનરના સ્ટાફ મેમ્બર સાથે ગેરવર્તન કરનાર મુસાફરને કાર્યવાહી મુજબ પોલીસને હવાલે કરવામાં આવ્યો છે. પ્રવક્તાએ જણાવ્યું હતું કે, “ઍર ઇન્ડિયા એક્સપ્રેસ અમારા મહેમાનો, કર્મચારીઓ અને અમારા ભાગીદારોની સલામતી અને સુખાકારીને જોખમમાં મૂકે તેવા કોઈપણ વર્તન પ્રત્યે તેની શૂન્ય સહિષ્ણુતાની નીતિનો પુનરોચ્ચાર કરે છે.”

નવી દિલ્હીથી વિશાખાપટ્ટનમ જઈ રહેલા ઍર ઈન્ડિયાના વિમાનમાં બોમ્બ હોવાની અફવા ફેલાઈ, મુસાફરોમાં ગભરાટ

મંગળવારે મોડી રાત્રે નવી દિલ્હીથી વિશાખાપટ્ટનમ જઈ રહેલી એર ઈન્ડિયાની ફ્લાઈટમાં બોમ્બ હોવાના સમાચાર આવ્યા હતા, પરંતુ વિશાખાપટ્ટનમમાં ઉતર્યા બાદ ઝીણવટભરી તપાસ કરવામાં આવી હતી અને આ સમાચાર ખોટા સાબિત થયા હતા. એક અધિકારીએ આ માહિતી આપી. વિશાખાપટ્ટનમ ઍરપોર્ટના ડાયરેક્ટર એસ રાજા રેડ્ડીએ કહ્યું કે કોઈએ દિલ્હી પોલીસને ફોન કરીને પ્લેનમાં બોમ્બ હોવાની માહિતી આપી હતી. તેને જોતા પોલીસે એવિએશન કંપની અને વિશાખાપટ્ટનમ ઍરપોર્ટને એલર્ટ કરી દીધું. રેડ્ડીએ પીટીઆઈને જણાવ્યું હતું કે, "વિમાન સુરક્ષિત રીતે ઊતર્યું હતું અને વિમાનની સંપૂર્ણ તપાસ કર્યા પછી જાણવા મળ્યું હતું કે બોમ્બના સમાચાર અફવા છે," તેમણે કહ્યું કે વિશાખાપટ્ટનમ જતી ફ્લાઈટમાં 107 મુસાફરો સવાર હતા.