મહારાષ્ટ્રના એક ગામે મહિલાઓનું માન જાળવવા ગાળો બોલવા પર પ્રતિબંધ મૂક્યો

ગ્રામપંચાયતમાં આ બાબતનો ઠરાવ પસાર કરીને આદેશનો ભંગ કરનારને ૫૦૦ રૂપિયા ફાઇન કરવાનું પણ નક્કી કર્યું

પ્રતીકાત્મક તસવીર

૨૦૨૧ની જનગણના મુજબ માત્ર ૧૮૦૦ લોકોની વસ્તી ધરાવતા મહારાષ્ટ્રના એક ગામની ગ્રામપંચાયતે મહિલાઓનું માન જા‍ળવવા ગામમાં ગાળો બોલવા પર પ્રતિબંધ મૂકી દીધો છે એટલું જ નહીં, આ બાબતનો ઠરાવ પસાર કરીને એનો ભંગ કરનારને ૫૦૦ રૂપિયા દંડ ફટકારવાનું પણ નક્કી કર્યું છે.

મહારાષ્ટ્રના અહિલ્યાનગર જિલ્લાના નેવાસા તાલુકાના સુંદાલા ગામની ગ્રામપંચાયતે આ અભૂતપૂર્વ નિર્ણય લીધો છે. ગામના સરપંચ શરદ અરગડેએ કહ્યું હતું કે ‘ગામમાં દલીલો કે ઝઘડો કરતી વખતે મા-બહેન પર ગાળો આપવી બહુ સામાન્ય થઈ ગયું હતું. ગાળો આપનાર એ ભૂલી જાય છે કે તેના પરિવારમાં પણ મા-બહેન છે એટલે મહિલાઓનું માન સાચવવા અમે ગામમાં ગાળો બોલવા પર પ્રતિબંધ મૂકી દીધો છે. જો કોઈ ગાળ બોલશે તો તેને ૫૦૦ રૂપિયાનો દંડ ફટકારવામાં આવશે. એ સિવાય ગામમાં જો કોઈ મહિલાના પતિનું અવસાન થાય તો માથામાંથી સિંદૂર ભૂંસી નાખવું, બંગડીઓ તોડી નાખવી કે પછી મંગળસૂત્ર કાઢી નાખવું જેવી પ્રથાઓ પર પણ પ્રતિબંધ મૂક્યો છે.’