ભીનો અને સૂકો કચરો છૂટો નહીં રાખો તો સફાઈ-કર્મચારીઓ જ દંડ ફટકારશે

કેન્દ્રનું પર્યાવરણ મંત્રાલય સૉલિડ વેસ્ટ મૅનેજમેન્ટનો ડ્રાફ્ટ તૈયાર કરી રહ્યું છે જેમાં આ જોગવાઈ રાખવામાં આવશે : આવતા વર્ષના ઑક્ટોબરથી નવા નિયમો લાગુ થઈ જશે

પ્રતીકાત્મક ફાઈલ તસવીર

હાઉસિંગ કૉમ્પ્લેક્સ કે પછી જ્યાં રોજ વધુ કચરો એકઠો થતો હોય એવી જગ્યાએ જો ભીનો અને સૂકો કચરો અલગ નહીં કર્યો હોય તો હવે એ કચરો લેવા આવનાર સફાઈ-કર્મચારી એને ઉપાડવાની ના પાડી દેશે અથવા એના માટે દંડ ફટકારશે.

કેન્દ્રનું પર્યાવરણ મંત્રાલય સૉલિડ વેસ્ટ મૅનેજમેન્ટનો ડ્રાફટ તૈયાર કરી રહી છે અને એમાં એવી જોગવાઈ કરવામાં આવી છે કે કચરો કલેક્ટ કરવા જનાર સફાઈ-કર્મચારીને જ એ છૂટો પાડ્યા વગરનો કચરો ન ઉપાડવાની અને દંડ ફટકારવાની સત્તા આપવામાં આવે. આ અંતર્ગત તૈયાર કરવામાં આવેલા નિયમો ૨૦૨૫ની ૧ ઑક્ટોબરથી લાગુ કરવામાં આવશે.

આ બાબતે સંકળાયેલા બધા લોકોનો અભિપ્રાય લઈને આ અંગેના નિયમ આવતા વર્ષની શરૂઆતના બે મહિનામાં નક્કી કરી લેવામાં આવશે. ૫૦૦૦ સ્ક્વેર મીટર કરતાં મોટી હોટેલ, રેસ્ટોરાં, માર્કેટ માટે ગયા અઠવાડિયે જ નિયમ બનાવવામાં આવ્યો છે કે એમણે ભીનો અને સૂકો કચરો છૂટો પાડીને જ આપવો પડશે. એમાંથી રીસાઇકલ થઈ શકે એવો કચરો કે વેસ્ટ રીસાઇકલ કરતી કંપનીને આપવાનો રહેશે.

આ સાથે જ પર્યાવરણ મંત્રાલય દ્વારા ગાઇડલાઇન્સ બનાવવામાં આવી રહી છે જે અંતર્ગત કચરામાંથી પૈસા કઈ રીતે ઊભા થઈ શકે અને એનર્જી કઈ રીતે જનરેટ કરી શકાય એના પર જોર આપવામાં આવી રહ્યું છે. એ જ રીતે એક વખત વપરાઈ ગયેલી પ્રોડક્ટને કઈ રીતે ફરી ઉપયોગમાં લઈ શકાય એની માહિતી પણ આ ગાઇડલાઇન્સમાં આપવામાં આવશે.