12 February, 2024 09:15 AM IST | Mumbai | Gujarati Mid-day Online Correspondent
મુંબઈનું વાતાવરણ દર્શાવવા માટે વાપરવામાં આવેલી પ્રતીકાત્મક તસવીર
Mumbai Weather forecast: આ વખતે ઠંડી જલ્દી જાય તેવી શક્યતા વચ્ચે મુંબઈનું તાપમાન ઘટ્યું છે. રવિવારે ઉપનગરનું ન્યૂનતમ તાપમાન ઘટીને 16.7 ડિગ્રી સેલ્સિયસ પર જઈ પહોંચ્યું. હવામાન વિશેષજ્ઞો પ્રમાણે, 14 ફેબ્રુઆરી સુધી રાતે ગરમીમાંથી રાહત રહેશે. આ વખતે હવામાન નિષ્ણાતોએ આગાહી કરી છે કે ફેબ્રુઆરીના અંતિમ સપ્તાહ સુધીમાં ઠંડીની મોસમ પૂરી થઈ જશે. ગત સપ્તાહે મહાનગરના દિવસ અને રાત્રિના તાપમાનમાં વધારો થયો હતો. દિવસનું તાપમાન 33 થી 35 ડિગ્રી સેલ્સિયસ સુધી પહોંચી ગયું હતું જ્યારે રાત્રિનું તાપમાન 20 થી 21 ડિગ્રી વચ્ચે રહ્યું હતું.
દરમિયાન, છેલ્લા બે દિવસમાં મુંબઈના તાપમાનમાં (Mumbai Weather forecast) ઘટાડો નોંધાયો હતો. પ્રાદેશિક હવામાન વિભાગના જણાવ્યા અનુસાર, રવિવારે મુંબઈમાં લઘુત્તમ તાપમાન ઘટીને 16.7 ડિગ્રી સેલ્સિયસ અને મહત્તમ તાપમાન 31.5 ડિગ્રી સેલ્સિયસ નોંધાયું હતું. હવામાનશાસ્ત્રી હૃષિકેશ આગ્રેએ જણાવ્યું હતું કે ઉત્તર તરફથી મુંબઈ તરફ આવતા ઠંડા પવનો વધુ મજબૂત બન્યા છે. આ સાથે પશ્ચિમ તરફથી આવતા ભેજવાળા પવનો પણ મુંબઈના તાપમાનને વધવા દેતા નથી, જેના કારણે ઘટાડો નોંધાયો છે. 14મી ફેબ્રુઆરી સુધી તાપમાન આમ જ રહેશે. હવામાન વિભાગના જણાવ્યા અનુસાર 17 ફેબ્રુઆરી સુધી મુંબઈનું લઘુત્તમ તાપમાન 17 થી 20 ડિગ્રી સેલ્સિયસ અને દિવસ દરમિયાન 30 થી 32 ડિગ્રી સેલ્સિયસની વચ્ચે રહેશે.
વાદળછાયું વાતાવરણ રહેવાની શક્યતા
Mumbai Weather forecast: મુંબઈ મહાનગરના આકાશમાં ફરી એકવાર વાદળો ઘેરાવા જઈ રહ્યા છે. હવામાન વિભાગના જણાવ્યા અનુસાર મુંબઈનું આકાશ 12 ફેબ્રુઆરીએ બપોરથી વાદળછાયું રહેશે. જોકે મુંબઈમાં વરસાદની શક્યતા ઓછી છે, પરંતુ રાજ્યના કેટલાક ભાગોમાં વરસાદને લઈને યલો એલર્ટ જારી કરવામાં આવ્યું છે.
હવામાન વિભાગે આપ્યો અંદાજ
પ્રાદેશિક હવામાન વિભાગના નિયામક સુનીલ કાંબલેએ જણાવ્યું હતું કે જ્યારે દેશના પૂર્વ અને ઉત્તરીય ભાગોમાંથી આવતા પવનો મળે છે ત્યારે ઉપરોક્ત સમીકરણ રચાય છે. રવિવાર અને સોમવારે બપોર બાદ આકાશ વાદળછાયું રહેશે. મધ્ય મહારાષ્ટ્રમાં પણ આ જ દ્રશ્ય જોવા મળશે.અમરાવતી, અકોલા, બુલઢાણા, ચંદ્રપુર સહિતના કેટલાક ભાગોમાં વરસાદને લઈને યલો એલર્ટ જારી કરવામાં આવ્યું છે. હાલમાં મુંબઈ માટે કોઈ એલર્ટ જારી કરવામાં આવ્યું નથી કારણ કે અહીં વરસાદની કોઈ શક્યતા નથી.
મહત્તમ તાપમાન 30 ડિગ્રી રહેશે
હવામાન વિભાગના અનુમાન મુજબ, 9 ફેબ્રુઆરીએ મુંબઈ ઉપનગરમાં લઘુત્તમ તાપમાન 19 ડિગ્રી સેલ્સિયસ નોંધાયું હતું, જ્યારે મહત્તમ તાપમાન 32 ડિગ્રી સેલ્સિયસ હતું. હવામાન વિભાગની આગાહી મુજબ, મુંબઈનું મહત્તમ તાપમાન 30 ડિગ્રીથી ઉપર રહેશે અને લઘુત્તમ તાપમાન 18 ડિગ્રીથી 21 ડિગ્રી સેલ્સિયસની વચ્ચે રહેશે. ગયા વર્ષે નવેમ્બરની શરૂઆતમાં, જ્યારે મુંબઈમાં પ્રદૂષણનું સ્તર વધી રહ્યું હતું, ત્યારે વરસાદે મુંબઈકરોને મોટી રાહત આપી હતી. વરસાદના કારણે વાતાવરણ ચોખ્ખું થઈ ગયું હતું.