18 December, 2023 08:20 AM IST | Mumbai | Gujarati Mid-day Online Correspondent
સજ્જન જિંદલ
Sajjan Jindal: એક મહિલાએ ઉદ્યોગપતિ સજ્જન જિંદલ પર લગ્નનું વચન આપીને રેપ કરવાનો આરોપ લગાવ્યો છે. આરોપ લગાવનાર આ મહિલા મુંબઈની રહેવાસી છે. રવિવારે જારી કરાયેલા એક નિવેદનમાં જિંદલે આરોપોને ખોટા અને પાયાવિહોણા ગણાવ્યા અને કહ્યું કે તે તપાસમાં સંપૂર્ણ સહયોગ કરવા તૈયાર છે.
નિવેદનમાં કહેવામાં આવ્યું છે કે તપાસ ચાલુ હોવાથી અમે આ તબક્કે વધુ ટિપ્પણી કરવાનું ટાળીશું. અમે કહીએ છીએ કે પરિવારની ગોપનીયતાનું સન્માન કરવામાં આવે. આરોપ લગાવનાર મહિલાની ઈન્ટરનેટ મીડિયા પ્રોફાઈલ તેણીને અભિનેત્રી તરીકે વર્ણવે છે.
મહિલાનો આરોપ- પરિણીત હોવાનો દાવો કર્યો
મહિલાએ દાવો કર્યો છે કે થોડા વર્ષો પહેલા તે દુબઈમાં એક ક્રિકેટ મેચ દરમિયાન USD 23 બિલિયન JSW ગ્રુપના ચેરમેન અને મેનેજિંગ ડિરેક્ટર જિંદલને મળી હતી. આ પછી બંને વચ્ચે મિત્રતા થઈ. મહિલાના કહેવા પ્રમાણે, બાદમાં ઉદ્યોગપતિ તેના તરફ ખૂબ જ આકર્ષાયા. 30 વર્ષીય મહિલાએ દાવો કર્યો છે કે આ વર્ષે 24 જાન્યુઆરીએ JSW ગ્રુપ હેડક્વાર્ટરની અંદર જાતીય સતામણી થઈ હતી. તેણીએ કહ્યું છે કે ઉદ્યોગપતિએ તેની સાથે લગ્ન કરવાનું વચન આપ્યું હતું. તેણે 16 ફેબ્રુઆરીએ પોલીસનો સંપર્ક કર્યો, પરંતુ 13 ડિસેમ્બરે મુંબઈના BKC પોલીસ સ્ટેશનમાં પોતાનું નામ નોંધાવ્યું.
આ કેસ આઈપીસી કલમ 376 (બળાત્કાર), 354 (મહિલાની નમ્રતાનો ભંગ) અને 506 (ગુનાહિત ધમકી) હેઠળ નોંધવામાં આવ્યો હતો. મહિલાએ દાવો કર્યો છે કે તે જિંદલને પહેલીવાર દુબઈના સ્ટેડિયમના વીઆઈપી બોક્સમાં મળી હતી. ત્યાં બંનેએ ફોન નંબરની આપ-લે કરી. મહિલાનો દાવો છે કે બાદમાં તે જિંદલને ઉપનગરીય બાંદ્રાની એક હોટલમાં અને દક્ષિણ મુંબઈમાં જિંદલ મેન્શનની અંદર મળી હતી.
કલમ 376 હેઠળ કેસ નોંધાયો
આ ઘટના બાદ MDએ એક્ટ્રેસનો નંબર બ્લોક કરી દીધો અને જ્યારે ડિરેક્ટરને ખબર પડી કે એક્ટ્રેસ ફરિયાદ કરવા જઈ રહી છે તો તેણે તેને ધમકાવવાનું શરૂ કર્યું. ત્યારબાદ અભિનેત્રીએ ફેબ્રુઆરી 2023માં કલમ 376 અને 354 હેઠળ એમડી વિરુદ્ધ પોલીસ ફરિયાદ નોંધાવી હતી. પોલીસે મહિનાઓ સુધી તેની ફરિયાદ પર ધ્યાન ન આપ્યું અને આ પછી અભિનેત્રીને કોર્ટમાં જવું પડ્યું.
કોણ છે સજ્જન જિંદલ?
સજ્જન જિંદલ સ્ટીલ વર્કસના ચેરમેન અને મેનેજિંગ ડિરેક્ટર છે, આજે દેશના સૌથી મોટા ઉદ્યોગપતિઓની યાદીમાં તેમનું નામ સામેલ છે, તેમણે મિકેનિકલ એન્જિનિયરિંગમાં બીએની ડિગ્રી લીધી છે અને તેમના પરિવારની સંપત્તિ કરોડોમાં છે.