03 April, 2022 01:12 PM IST | Mumbai | Gujarati Mid-day Online Correspondent
પ્રવીણ દરેકર
મુંબઈ પોલીસે મુંબૈ બેન્ક લેબર કેસમાં વિધાન પરિષદમાં વિરોધ પક્ષના નેતા પ્રવીણ દરેકરને નોટિસ પાઠવી છે. પ્રવીણ દરેકરને સોમવારે (4 એપ્રિલ) મુંબઈના માતા રમાબાઈ આંબેડકર પોલીસ સ્ટેશનમાં હાજર રહેવાનો આદેશ આપવામાં આવ્યો છે. આમ આદમી પાર્ટીના ધનંજય શિંદેએ પ્રવીણ દરેકર વિરુદ્ધ ફરિયાદ નોંધાવી હતી. દરેકર પર આરોપ છે કે તેમણે મજૂર ન હોવા છતાં મુંબૈ બેન્કના ડાયરેક્ટર પદ માટે એક જ વર્ગમાંથી ચૂંટણી લડીને લગભગ 20 વર્ષ સુધી સરકાર સાથે છેતરપિંડી કરી રહ્યા છે, ત્યાર બાદ પ્રવીણ દરેકર વિરુદ્ધ છેતરપિંડીનો કેસ નોંધવામાં આવ્યો હતો.
મુંબઈ પોલીસ આ કેસમાં પ્રવીણ દરેકરની પૂછપરછ કરશે. મુંબઈ પોલીસે પ્રવીણ દરેકરને નોટિસ પાઠવીને સોમવારે સવારે 11 વાગ્યે પોલીસ સ્ટેશનમાં રિપોર્ટ કરવા સૂચના આપી છે.
પ્રવીણ દરેકર મુંબૈ બેન્કના ડાયરેક્ટર તરીકે બિનહરીફ ચૂંટાયા હતા. મુંબૈ બેન્કની ચૂંટણીમાં, પ્રવીણ દરેકર લેબર અને નાગરી સહકાર બેન્કની બંને શ્રેણીમાંથી ચૂંટાયા હતા, પરંતુ સહકાર વિભાગે પ્રવીણ દરેકરને મજૂર તરીકે ગેરલાયક ઠેરવ્યા હતા. દરેકર 1997થી લેબર કેટેગરીમાંથી મુંબૈ બેન્કના ડાયરેક્ટર તરીકે ચૂંટાયા છે.
જોકે, આમ આદમી પાર્ટીના ધનંજય શિંદેએ પ્રવીણ દરેકર સામે ફરિયાદ નોંધાવી હતી કે તેમણે મજૂર ન હોવા છતાં ચૂંટણી લડીને હજારો બેન્ક થાપણદારો અને સરકાર સાથે છેતરપિંડી કરી છે. દરેકર પર મુંબૈ બેન્કમાં કરોડો રૂપિયાના કૌભાંડમાં કો-ઓપરેશન એક્ટનું ઉલ્લંઘન કરવાનો આરોપ છે.
મુંબૈ બેન્કમાં બોગસ મજૂરી કેસમાં મુંબઈ હાઈકોર્ટે પ્રવીણ દરેકરને બે અઠવાડિયાની રાહત આપી છે. સમયના અભાવે 29 માર્ચે દરેકરના આગોતરા જામીન પર હાઈકોર્ટમાં સુનાવણી થઈ શકી ન હતી. તેથી, તેમના વકીલ અખિલેશ ચૌબેએ કોર્ટને આગામી સુનાવણી સુધી આપવામાં આવેલી રાહતને યથાવત રાખવા જણાવ્યું હતું.
જસ્ટિસ અનુજા પ્રભુદેસાઈએ માગણી સ્વીકારી અને મુંબઈ પોલીસને આગામી સુનાવણી સુધી કોઈની ધરપકડ ન કરવા નિર્દેશ આપ્યો હતો. આ પહેલા મુંબઈ સેશન્સ કોર્ટે 25 માર્ચે દરેકરની જામીન અરજી ફગાવી દીધી હતી. જોકે, 29 માર્ચ સુધી તેમની અટકાયતમાંથી તેમને આપવામાં આવેલી રાહત આગામી બે અઠવાડિયા (12 એપ્રિલ) માટે યથાવત રાખવામાં આવી છે જેથી ચુકાદાને હાઈકોર્ટમાં પડકારી શકાય.