મુંબઈ સેન્ટ્રલ બાદ AC લોકલો સીધી ચર્ચગેટ જઈને ઊભી રહી

શુક્રવારે અનેક પ્રવાસીઓની ફરિયાદ, રેલવે કહે છે કે અનાઉન્સમેન્ટ કરવામાં આવ્યું હતું

પ્રતીકાત્મક તસવીર

વેસ્ટર્ન રેલવેના કેટલાક પ્રવાસીઓએ ગઈ કાલે ફરિયાદ કરી હતી કે બોરીવલી-ચર્ચગેટ ઍર-કન્ડિશન્ડ (AC) લોકલ ટ્રેનો શુક્રવારે મુંબઈ સેન્ટ્રલ અને ચર્ચગેટ વચ્ચેનાં સ્ટેશનો પર એમનાં નિયમિત સ્ટેશનો પર ઊભી રહી નહોતી. જોકે આ મુદ્દે વેસ્ટર્ન રેલવેના પ્રવક્તાએ કહ્યું હતું કે આ મુદ્દે પ્રોટોકૉલ મુજબ જાહેરાતો કરવામાં આવી હતી.

આ મુદ્દે પ્રવાસી રાજીવ સિંઘલે કહ્યું હતું કે ‘હું ૧.૫૪ વાગ્યાની બોરીવલી-ચર્ચગેટ AC લોકલ ટ્રેનમાં પ્રવાસ કરતો હતો અને મારે મરીન લાઇન્સ ઊતરવાનું હતું. આ મારી રોજની ટ્રેન છે અને એ મુંબઈ સેન્ટ્રલથી ચર્ચગેટ સુધી બધાં સ્ટેશનો પર ઊભી રહે છે. જોકે શુક્રવારે મુંબઈ સેન્ટ્રલથી ઊપડીને એ સીધી ચર્ચગેટ સ્ટેશન પર ઊભી રહી હતી. વચ્ચેનાં ગ્રાન્ટ રોડ, ચર્ની રોડ અને મરીન લાઇન્સ સ્ટેશન પર એ ઊભી રહી નહોતી. આ મુદ્દે કોઈ જાહેરાત કે અનાઉન્સમેન્ટ થઈ નહોતી. હું મોટરમૅનને મળવા ગયો અને ટ્રેન-મૅનેજર બબ્બનકુમાર સાથે મારે વાત થઈ. તેમણે મને કહ્યું કે આ બાબતે મેં મુંબઈ સેન્ટ્રલ સ્ટેશન પર જાહેરાત કરી હતી. મેં કહ્યું કે ટ્રેનમાં કોઈ અનાઉન્સમેન્ટ થઈ નહોતી. એ પછી મેં સિનિયર ઑપરેશન્સ મૅનેજરને પણ ફરિયાદ કરી. તેમણે પણ મને જણાવ્યું કે મને આ બાબતની જાણ નથી.’

આ મુદ્દે વેસ્ટર્ન રેલવેના ડિવિઝનલ અધિકારીએ કહ્યું હતું કે ‘ટ્રેનોમાં ક્યારેક ટેક્નિકલ ખામી ઊભી થઈ રહી છે, પણ ટ્રેન-મૅનેજરે પ્રૉપર અનાઉન્સમેન્ટ ત્રણ ભાષામાં કરી હતી. રેલ યાત્રી ઍપ પર પણ આની જાણકારી અપાઈ હતી.’