આજથી ૮ માર્ચ સુધી MTDCની હોટેલમાં મહિલાઓને ૫૦ ટકા ડિસ્કાઉન્ટ

પ્રતીકાત્મક તસવીર

ઇન્ટરનૅશનલ વિમેન્સ ડેને ધ્યાનમાં રાખીને મહારાષ્ટ્ર ટૂરિઝમ ડેવલપમેન્ટ કૉર્પોરેશન (MTDC)એ રાજ્યની મહિલાઓ માટે અમુક સવલતો જાહેર કરી છે, જેમાં મુખ્યત્વે આજથી ૮ માર્ચ સુધી MTDC સાથે સંલગ્ન હોટેલ્સમાં પચાસ ટકા ડિસ્કાઉન્ટ ઑફર કર્યું છે. વળી આ ૫૦ ટકાનું ડિસ્કાઉન્ટ માત્ર એક અઠવાડિયા પૂરતું જ નથી, વર્ષ દરમ્યાન બીજા બાવીસ દિવસ પણ આ ઑફરનો ફાયદો મહિલાઓ લઈ શકશે. જોકે એના દિવસો તેઓ MTDCની વેબસાઇટ પર જાહેર કરવાના છે.

રાજ્યના કૅબિનેટ પ્રધાન શંભુરાજ દેસાઈએ આ બાબતે માહિતી આપતાં કહ્યું હતું કે ‘મહિલાઓ પ્રવાસ અને પર્યટન સુર​િક્ષતપણે અને વધુ સુવિધાજનક રીતે કરી શકે એ માટે MTDCએ  ખાસ આઈ (મમ્મી) નામની પૉલિસી અપનાવી હતી. આ પૉલિસી અંતર્ગત ગયા વર્ષે વિમેન્સ ડેના દિવસે ઑફર કરાયેલા ડિસ્કાઉન્ટને બહુ જ સારો પ્રતિસાદ મળ્યો હતો અને ૧૫૦૦ મહિલાઓએ એનો લાભ લીધો હતો. એથી આ જ પૉલિસીને આ વર્ષે પણ‌ ચાલુ રાખવામાં આવી છે.’

મહિલાઓ MTDCની વેબસાઇટ પર બુકિંગ કરાવીને આ ૫૦ ટકા ડિસ્કાઉન્ટનો લાભ મેળવી શકે છે. મહિલાઓ વધુ ને વધુ પ્રવાસ કરતી થાય એથી તેમની સુરક્ષાને ધ્યાનમાં રાખી MTDC દ્વારા નાગપુર, છત્રપતિ સંભાજી નગર અને ખારઘરમાં ફક્ત મહિલાઓ દ્વારા જ મૅનેજ કરવામાં આવતી હોટેલ પણ શરૂ કરવામાં આવી છે. એમાં રિસૉર્ટ-મૅનેજમેન્ટથી લઈને સિક્યૉરિટી, ટૅક્સી-સર્વિસિસ, હાઉસકીપિંગ અને હૉસ્પિટૅલિટી એમ દરેક વિભાગમાં માત્ર મહિલાઓને જ જૉબ પર રાખવામાં આવી છે. આમ તેમને રોજગાર આપવાનો પણ પ્રયાસ કરવામાં આવી રહ્યો છે.