Maratha Reservation: સરકાર એક્શન મોડમાં, મનોજ જરાંગે સામે એક જ દિવસમાં હજારો કેસ દાખલ

મનોજ જરાંગે નાયબ મુખ્યપ્રધાન દેવેન્દ્ર ફડણવીસની એકવચન અને નીચી ભાષામાં ટીકા કર્યા બાદ અત્યાર સુધી સબુરીની નીતિ અપનાવતી રાજ્ય સરકાર (Maratha Reservation) એક્શન મોડમાં આવી ગઈ છે

મનોજ જરાંગે પાટીલ

મનોજ જરાંગે નાયબ મુખ્યપ્રધાન દેવેન્દ્ર ફડણવીસની એકવચન અને નીચી ભાષામાં ટીકા કર્યા બાદ અત્યાર સુધી સબુરીની નીતિ અપનાવતી રાજ્ય સરકાર (Maratha Reservation) એક્શન મોડમાં આવી ગઈ છે. અગાઉ પોલીસે મરાઠા પ્રદર્શનકારીઓ સામે કેસ નોંધ્યા હતા. જોકે, સોમવારે પહેલીવાર પોલીસ દ્વારા મનોજ જરાંગે પાટીલ સામે સીધો કેસ નોંધવામાં આવ્યો હતો.

ગઈકાલથી રાજ્ય સરકાર (Maratha Reservation) દ્વારા લગભગ 1041 કેસ નોંધાયા છે. આમાંથી 425 કેસ મરાઠવાડામાં નોંધાયા છે. બીડ જિલ્લાના શિરુર અને અમલનેરમાં મનોજ જરાંગે વિરુદ્ધ કેસ નોંધવામાં આવ્યો છે. પોલીસે જરાંગે સામે લોકોને રસ્તો રોકવા માટે ઉશ્કેરવા બદલ ગુનો નોંધ્યો હોવાનું જાણવા મળે છે.

ભાજપના ધારાસભ્યોની બેઠકમાં મહત્ત્વનો નિર્ણય

મરાઠા આરક્ષણ (Maratha Reservation) મુદ્દે રાજ્યમાં ફરી એકવાર વાતાવરણ ગરમાય તેવી શક્યતા છે. આ પૃષ્ઠભૂમિમાં સોમવારે મુંબઈમાં ભાજપના ધારાસભ્યોની બેઠક યોજાઈ હતી. આ પ્રસંગે ભાજપના ધારાસભ્યોને મહત્વની સૂચનાઓ આપવામાં આવી હતી. તેમાં કહેવામાં આવ્યું હતું કે, “અમે મરાઠા સમુદાયના સમર્થનમાં છીએ, તમારા સંબંધિત મતવિસ્તારમાં જાઓ અને આ બાબત સામાન્ય નાગરિકો સુધી પહોંચાડો.”

કહેવાયું હતું કે, “મનોજ જરાંગે પાટીલ અંગત સ્વાર્થ માટે રાજકીય ભાષા બોલી રહ્યા છે. મરાઠા આરક્ષણનો મુદ્દો સંયમથી સંભાળવો જોઈએ. ભાજપ મરાઠા સમુદાયની પડખે રહેશે.” આ પહેલા પણ ભાજપ સરકારે હાઈકોર્ટમાં મરાઠા સમુદાયને આપવામાં આવેલ આરક્ષણને યથાવત રાખ્યું હતું. હાલમાં પણ ભાજપના ધારાસભ્યોને સૂચના આપવામાં આવી છે કે તેઓ લોકોને વિશ્વાસ આપે કે નવી આપવામાં આવેલી અનામત કોર્ટમાં ટકી રહેશે. તેમ જ આ બેઠકમાં ભાજપના ધારાસભ્યોએ મનોજ જરાંગેના નિવેદન અંગે નારાજગી વ્યક્ત કરી હતી. ભાજપના ધારાસભ્યોને પણ કહેવામાં આવ્યું છે કે મનોજ જરાંગે રાજકીય ભાષા બોલે તો તેનો જવાબ આપે.

મનોજ જરાંગેની ભૂખ હડતાલ મોકુફ

મનોજ જરાંગે પાટીલે સોમવારે બપોરે જાહેરાત કરી હતી કે તેઓ તેમના આમરણાંત ઉપવાસને સ્થગિત કરી રહ્યાં છે. તેમણે કહ્યું કે, તેઓ તેને સાંકળ ભૂખ હડતાળમાં ફેરવી દેશે. મનોજ જરાંગે આગામી એક-બે દિવસ સારવાર લીધા બાદ હવે મરાઠા બંધુઓને મળવા માટે ગામડે-ગામડે જઈ રહ્યો છે. હવે જોવાનું એ રહેશે કે મનોજ જરાંગેની મુલાકાતોને મરાઠા બંધુઓ તરફથી પહેલા જેવો જ પ્રતિસાદ મળશે કે કેમ. મરાઠા આંદોલન ભડક ન થાય તે માટે રાજ્ય સરકારે સાવચેતીનાં પગલાં લીધાં છે. આ માટે મરાઠવાડાના ત્રણ જિલ્લામાં ઈન્ટરનેટ સેવા બંધ કરી દેવામાં આવી છે.

આંબડમાં કરફ્યુ

મહારાષ્ટ્રમાં મરાઠા આરક્ષણના મુદ્દે આજે આંબડ તાલુકામાં હિંસા ફાટી નીકળી હતી. હિંસા દરમિયાન પ્રદર્શનકારીઓએ રાજ્ય પરિવહનની બસને આગ ચાંપી દીધી હતી. કાયદો અને વ્યવસ્થા જાળવવા માટે સ્થાનિક વહીવટીતંત્ર દ્વારા આંબડ તાલુકામાં કરફ્યુ લાદી દેવામાં આવ્યો છે. જાલના જિલ્લા મેજિસ્ટ્રેટ શ્રી કૃષ્ણ પંચાલે કર્ફ્યુ લાદવાનો આદેશ આપ્યો છે. જો કે, સરકારી કચેરીઓ, રાષ્ટ્રીય ધોરીમાર્ગો પરની અવરજવર, દૂધ પુરવઠો, મીડિયા, તબીબી ક્ષેત્રને આ કર્ફ્યુમાંથી મુક્તિ આપવામાં આવી છે.