હિતેન્દ્ર ઠાકુરને હરાવીને ૩૫ વર્ષે સસરાની હત્યાનો બદલો લીધો સ્નેહા દુબે પંડિતે

સુરેશ દુબેએ જયેન્દ્ર ઠાકુર ઉર્ફે ભાઈ ઠાકુરને પ્લૉટ આપવાની ના પાડતાં આ હત્યા કરવામાં આવી હોવાનું બાદમાં તપાસમાં જણાયું હતું અને કોર્ટે ભાઈ ઠાકુર સહિત તેમના સાથીઓને કેદની સજા કરી હતી

સ્નેહા દુબે પંડિતે ગઈ કાલે રાજ્યના નાયબ મુખ્ય પ્રધાન દેવેન્દ્ર ફડણવીસની મુલાકાત કરી હતી.

નાલાસોપારા સ્ટેશન પર ૧૯૮૯ની ૯ ઑક્ટોબરે ઉત્તર પ્રદેશમાંથી મુંબઈ આવેલા સુરેશ દુબેની ફાયરિંગ કરીને સરેઆમ હત્યા કરવામાં આવી હતી. સુરેશ દુબેએ જયેન્દ્ર ઠાકુર ઉર્ફે ભાઈ ઠાકુરને પ્લૉટ આપવાની ના પાડતાં આ હત્યા કરવામાં આવી હોવાનું બાદમાં તપાસમાં જણાયું હતું અને કોર્ટે ભાઈ ઠાકુર સહિત તેમના સાથીઓને કેદની સજા કરી હતી. ભાઈ ઠાકુર જેલમાં ગયા બાદ તેમના નાના ભાઈ હિતેન્દ્ર ઠાકુર વસઈ-વિરાર વિસ્તારમાંથી પહેલી વખત અપક્ષ વિધાનસભ્ય તરીકે ચૂંટાઈ આવ્યા હતા. હત્યાની આ ઘટનાનાં ૩૫ વર્ષ પછી સુરેશ દુબેના પુત્ર નવીન દુબેનાં પત્ની સ્નેહા દુબે પંડિતે આ વખતની વિધાનસભાની ચૂંટણીમાં હિતેન્દ્ર ઠાકુરને વસઈ બેઠક પર હરાવીને રાજકીય બદલો લીધો છે. સ્નેહા પંડિત વસઈના સ્થાનિક નેતા વિવેક પંડિતનાં પુત્રી છે. ૨૦૦૯માં વિવેક પંડિતે હિતેન્દ્ર ઠાકુરના ઉમેદવાર નારાયણ માનકરનો આ જ બેઠક પર પરાજય કર્યો હતો.