19 November, 2024 10:01 AM IST | Mumbai | Gujarati Mid-day Correspondent
અનિલ દેશમુખના માથામાં પથ્થર વાગતાં લોહી નીકળવા લાગ્યું હતું
મહારાષ્ટ્ર વિધાનસભાની ચૂંટણીના પ્રચારની પડઘમ ગઈ કાલે સાંજે શાંત થઈ ગઈ હતી ત્યારે નાગપુર જિલ્લામાં આવેલી કાટોલ બેઠકના ભૂતપૂર્વ વિધાનસભ્ય અને નૅશનલિસ્ટ કૉન્ગ્રેસ પાર્ટી (NCP-શરદચંદ્ર પવાર)ના ઉમેદવાર અનિલ દેશમુખની કાર પર ગઈ કાલે મોડી સાંજે એક વ્યક્તિએ પથ્થરમારો કર્યો હતો જેમાં અનિલ દેશમુખના માથામાં ઈજા થતાં તેમના કપાળમાંથી લોહી વહેવા માંડ્યું હતું. કાટોલ જલાલખેડા રોડ પર આવેલા બેલફાટા પાસેની આ ઘટના બાદ અનિલ દેશમુખને હૉસ્પિટલમાં ઍડ્મિટ કરવામાં આવ્યા હોવાનું જાણવા મળ્યું હતું. અનિલ દેશમુખની કાર પસાર થઈ રહી હતી ત્યારે અચાનક એક માણસ રસ્તામાં ઊભો રહી ગયો હતો અને તેણે આ હુમલો કર્યો હોવાનું પોલીસની પ્રાથમિક તપાસમાં જણાયું હતું. જોકે ભારતીય જનતા પાર્ટીના સ્થાનિક નેતાએ દાવો કર્યો હતો કે પોતાના પર હુમલો થયો હોવાનો સ્ટન્ટ અનિલ દેશમુખે ઊભો કરીને લોકોની લાગણી મેળવવાનો આ પ્રયાસ છે.