11 March, 2025 03:42 PM IST | Mumbai | Gujarati Mid-day Correspondent
પ્રતીકાત્મક તસવીર
ડોમ્બિવલીના કચોરે ગામમાં રવિવારે રાતે ૮ વાગ્યે રાષ્ટ્રીય સ્વયંસેવક સંઘ (RSS)ની બાળકોની શિબિર ચાલી રહી હતી ત્યારે તેમના પર અજાણ્યા લોકો દ્વારા પથ્થરમારો કરવામાં આવ્યો હતો. નસીબજોગે કોઈને ઈજા થઈ નહોતી. આ સંદર્ભે પોલીસ-ફરિયાદ કરવામાં આવતાં પોલીસે અજાણ્યા શખ્સો સામે ગુનો નોંધી તપાસ શરૂ કરી પાંચ જણને તાબામાં લીધા હતા જેમાં ચાર સગીર છે. તેમણે આ પથ્થરમારો શા માટે કર્યો એની તપાસ હવે ચાલી રહી છે.
ડોમ્બિવલીના તિલકનગર પોલીસ-સ્ટેશનના સિનિયર પોલીસ-ઇન્સ્પેક્ટર વિજયકુમાર કદમે આ બાબતે કહ્યું હતું કે ‘અમે આ કેસમાં ઘટનાસ્થળની આજુબાજુનાં ક્લોઝ્ડ સર્કિટ ટેલિવિઝન (CCTV) કૅમેરાનાં ફુટેજની ચકાસણી કરીને પથ્થરમારો કરનારા હુમલાખોર કોણ હતા એ શોધી કાઢ્યું હતું.’
RSSના સ્થાનિક કાર્યકરે કહ્યું હતું કે ‘શિબિર પર પથ્થરમારો કરવામાં આવ્યો હોય એવું આ એક જ મહિનામાં બીજી વાર બન્યું છે. ફરી આવી ઘટના ન બને એ માટે પોલીસે આ વિસ્તારમાં પૅટ્રોલિંગ વધારી દીધું છે.’