અંબાણી વેડિંગ ઇફેક્ટ્સ: બાંદરા-કુર્લા કૉમ્પ્લેક્સની ફાઇવસ્ટાર હોટેલમાં એક દિવસનું ભાડું એક લાખ રૂપિયા

આ લગ્નનું આયોજન બાંદરા-કુર્લા કૉમ્પ્લેક્સમાં આવેલા જિયો વર્લ્ડ કન્વેન્શન સેન્ટરમાં ૧૨થી ૧૪ જુલાઈ દરમ્યાન કરવામાં આવ્યું છે.

ટ્રાયડન્ટ હૉટેલ

મુકેશ અંબાણીના દીકરા અનંત અંબાણી અને રાધિકા મર્ચન્ટનાં લગ્નને કારણે હોટેલના ભાવ વધી ગયા છે. આ લગ્નનું આયોજન બાંદરા-કુર્લા કૉમ્પ્લેક્સમાં આવેલા જિયો વર્લ્ડ કન્વેન્શન સેન્ટરમાં ૧૨થી ૧૪ જુલાઈ દરમ્યાન કરવામાં આવ્યું છે. આ લગ્નને કારણે એની આસપાસની તમામ ફાઇવસ્ટાર હોટેલના ભાવ વધી ગયા છે. મોટા ભાગની ફાઇવસ્ટાર હોટેલની રૂમ બુક થઈ ગઈ છે. ટ્રાયડન્ટ અને સૉફિટેલ જેવી હોટેલની બધી રૂમ બુક થઈ ગઈ છે. એક હોટેલમાં જે રૂમનું ભાડું ૧૩,૦૦૦ હતું એનું હાલમાં ૯૧,૩૫૦ રૂપિયા થઈ ગયું છે. આ ડિમાન્ડ ફક્ત ત્રણ દિવસ પૂરતી છે. આ લગ્નને કારણે મુંબઈ પોલીસ વેન્યુની આસપાસના રોડ બંધ કર્યા હોવાની જાહેરાત કરવામાં આવી છે. આ પ્રકારની ઇવેન્ટને કારણે ફક્ત હોટેલ જ નહીં, ફ્લાઇટના ભાવ પણ વધી ગયા છે. બાંદરા-કુર્લા કૉમ્પ્લેક્સની હોટેલના ભાવને કારણે એની આસપાસની અન્ય ફાઇવસ્ટાર હોટેલના ભાવમાં પણ ઘણો વધારો થયો છે.