ડૉલરના એક્સચેન્જની લાલચ આપીને રિક્ષાચાલક સાથે ત્રણ લાખની ઠગાઈ

થાણેના પોલીસ અધિકારીએ જણાવ્યું હતું

પ્રતીકાત્મક તસવીર

ભાંડુપના એક રિક્ષા-ડ્રાઇવરને અમેરિકન ડૉલર એક્સચેન્જમાં આપવાની લાલચ આપીને પાંચ શખ્સોએ તેની સાથે ત્રણ લાખ રૂપિયાની છેતરપિંડી કરી હોવાનું થાણેના પોલીસ અધિકારીએ ગુરુવારે જણાવ્યું હતું. 

જયપ્રકાશ દુબેએ તેની રિક્ષામાં આરોપી મહિલાને બીજી જૂનના રોજ મુંબઈ ઉતારી હતી. એ દરમિયાન વાતચીત થતાં મહિલાએ તેને કહ્યું હતું કે તેની પાસે ડૉલર છે.

થાણેના પોલીસ અધિકારીએ જણાવ્યું હતું કે ‘એ પછી આરોપીઓ ઘણા દિવસો સુધી ફોન મારફત જયપ્રકાશના સંપર્કમાં રહીને તેનો વિશ્વાસ જીતતા રહ્યા. જયપ્રકાશે મહિલા અને તેના સાગરીતોને એક પૅકેટના બદલામાં ત્રણ લાખ રૂપિયા આપ્યા. આરોપીઓના દાવા પ્રમાણે એ પૅકેટમાં ૬૩૫ ડૉલરની નોટો હતી. જયપ્રકાશે પૅકેટ ખોલતાં એમાં રદ્દી કાગળો ભર્યા હતા.’

આ મામલે પોલીસે છેતરપિંડીનો કેસ દાખલ કરીને પાંચેય આરોપીઓને ઝડપી લેવા માટે કાર્યવાહી શરૂ કરી હતી.