હવે ગોવા જવા માટે વેસ્ટર્ન રેલવેમાંથી પણ ટ્રેન

બાંદરા ટર્મિનસથી ટ્રેન-નંબર ૧૦૧૧૫ દર બુધવારે અને શુક્રવારે સવારે ૬.૫૦ વાગ્યે ઊપડશે જે એ જ દિવસે રાતે ૧૦ વાગ્યે મડગાંવ પહોંચશે.

ગઈ કાલે બોરીવલીથી ગોવા જવા ઊપડેલી ટ્રેન. તસવીર: સતેજ શિંદે

મુંબઈગરાઓ માટે હવે કોંકણ અને ગોવા જવાનો એક વધુ વિકલ્પ ખુલ્લો થયો છે. ખાસ કરીને મુંબઈનાં વેસ્ટર્ન સબર્બ્સમાં રહેતા લોકો માટે વેસ્ટર્ન લાઇનથી સીધી જ મડગાંવ-ગોવા જતી ટ્રેન ગઈ કાલથી શરૂ થઈ છે. કેન્દ્રના કૉમર્સ મિનિસ્ટર અને ઉત્તર મુંબઈના સંસદસભ્ય પીયૂષ ગોયલે ગઈ કાલે એને બોરીવલીથી લીલી ઝંડી બતાવી હતી. 
બાંદરા ટર્મિનસથી ટ્રેન-નંબર ૧૦૧૧૫ દર બુધવારે અને શુક્રવારે સવારે ૬.૫૦ વાગ્યે ઊપડશે જે એ જ દિવસે રાતે ૧૦ વાગ્યે મડગાંવ પહોંચશે. મડગાવથી ટ્રેન-નંબર ૧૦૧૧૬ મંગળવારે અને ગુરુવારે સવારે ૭.૨૦ વાગ્યે ઊપડશે જે એ જ દિવસે રાતે ૧૧.૪૦ વાગ્યે બાંદરા પહોંચશે. આ ટ્રેન બાંદરાથી બોરીવલી, વસઈ, ભિવંડી રોડ, પનવેલ, રોહા, વીર, ચિપલૂણ, રત્નાગિરિ, કણકવલી, સિંધુદુર્ગ, સાવંતવાડી રોડ, થિવિમ, કરમાલી સ્ટેશન થઈને મડગાંવ પહોંચશે.