વડનગરમાં હીરાબા માટે પૂજાઅર્ચના થઈ

નરેન્દ્ર મોદીનાં માતા માટે વડનગર સહિત દેશભરમાં પ્રાર્થના કરવામાં આવી

વડનગરમાં હીરાબા માટે પૂજાઅર્ચના થઈ

અમદાવાદ : હીરાબાની તબિયત નાદુરસ્ત થતાં દેશભરમાં ચિંતાનું મોજું પ્રસરી ગયું હતું અને તેમના માટે ઠેર-ઠેર પૂજાઅર્ચના કરવામાં આવી હતી એટલું જ નહીં, વડનગરમાં આવેલા હાટકેશ્વર મહાદેવ મંદિરમાં હીરાબા જલદી સાજાં થઈ જાય એ માટે પૂજાઅર્ચના કરવામાં આવી હતી.

ગઈ કાલે બપોર સુધીમાં તો દેશ અને દુનિયામાં હીરાબાની તબિયતના અને હૉસ્પિટલમાં ઍડ્મિટ કર્યાં હોવાના સમાચાર પહોંચી ગયા હતા, જેના કારણે લોકોમાં તેમના સ્વાસ્થ્યને લઈને એક પ્રકારની ચિંતા ઊભી થઈ હતી. હીરાબા જલદી સાજાં થઈ જાય એ માટે અમદાવાદ, વડનગર સહિત સમગ્ર ગુજરાત ઉપરાંત દેશભરમાં લોકોએ પ્રાર્થના કરી હતી. બીજી તરફ વડનગરમાં આવેલા હાટકેશ્વર મંદિરમાં પૂજારી દ્વારા હીરાબા જલદી સાજાં થઈને ઘરે આવી જાય એ માટે હાટકેશ્વર મહાદેવને પ્રાર્થના અને પૂજા કરવામાં આવી હતી તેમ જ અભિષેક કરાયો હતો.

વડનગરમાં જે સ્થળે હીરાબા રહેતાં હતાં એ મહોલ્લાના લોકોએ હીરાબાના સ્વાસ્થ્ય માટે રામધૂન કરી હતી અને હીરાબાને ભગવાન સાજાં કરી દે એ માટે વડનગરનાં દેવમંદિરોમાં પ્રાર્થના કરવામાં આવી હતી.