એક બૉડી અને દોઢસો તરવૈયા

મોરબીના ઝૂલતા પુલની હોનારતમાં સરકારી ચોપડે હજી એક વ્યક્તિ મિસિંગ છે, જેની બૉડી શોધવા માટે અત્યારે મચ્છુમાં દોઢસો તરવૈયા સહિત દેશની ચાર એજન્સી કામે લાગી છે

હજી પણ સર્ચ ઓપરેશન ચાલી રહ્યું છે

દોઢસોથી વધારે લોકોનો ભોગ લેનારી મોરબી ઝૂલતા પુલ હોનારતમાં સરકારી આંકડા મુજબ તમામ બૉડી શોધી લેવામાં આવી છે, પણ એક વ્યક્તિ હજી મિરસિંગ છે, જેને શોધવાની અત્યારે કામગીરી ચાલી રહી છે. જે ગુમ છે એ હયાત હોવાની સંભાવના નહીંવત્ છે એટલે ખેદ સાથે કહેવું પડે કે જે મિસિંગ છે એ ડેડ-બૉડી જ છે. આ એક ડેડ-બૉડી શોધવા માટે અત્યારે દોઢસો તરવૈયા અને દેશની ચાર એજન્સીઓ કામે લાગેલી છે.

નૅશનલ ડિઝૅસ્ટર રિસ્પૉન્સ ફોર્સ, આર્મી અને નેવી સાથે મોરબી નગરપાલિકાનો સ્ટાફ આ એક બૉડીને શોધવાની કોશિશ છેલ્લા ૪૮ કલાકથી કરે છે, પણ તેમને સફળતા નથી મળી. મચ્છુમાં બાઝી ગયેલી ગાંડી વેલને કારણે એ બૉડી તળિયે રહેલા કાદવમાં ખૂંપી ગઈ હશે, એવા અનુમાન સાથે ગાંડી વેલ દૂર કરવાનું કામ પણ ચાલે છે તો ઝૂલતા પુલથી એકાદ કિલોમીટરના અંતરે આવેલો ચેકડૅમ તોડવાનું કામ પણ કરવામાં આવ્યું છે અને એ પછી પણ પાણી ઓછું નહીં થતાં હવે મચ્છુ નદીના આ ભાગમાં પાણી ખેંચવાની ચાર મોટર મૂકીને પાઇપથી પાણી કાઢવાનું કામ પણ શરૂ થયું છે.