૬૦મા વર્ષમાં પ્રવેશ કરશે બૉલીવુડનો બાદશાહ

શાહરુખ ખાનની ૫૯મી વર્ષગાંઠ માટે ગ્રૅન્ડ પાર્ટીનું આયોજન કર્યું છે પત્ની ગૌરીએ : ૨૫૦ દોસ્તોને ઇન્વિટેશન

શાહરુખ ખાન

જન્મદિવસે દીકરી સુહાના સાથેની ફિલ્મ કિંગની જાહેરાત કરે એવી શક્યતા

બૉલીવુડના બાદશાહ શાહરુખ ખાનની બીજી નવેમ્બરે ૫૯મી વર્ષગાંઠ છે એ નિમિત્તે અભિનેતાની પત્ની ગૌરી ખાને તેની ટીમ સાથે મળીને એક ગ્રૅન્ડ પાર્ટીનું આયોજન કર્યું હોવાનું જાણવા મળ્યું હતું. શાહરુખ ખાન આ વખતે તેનો બર્થ-ડે પરિવાર અને ફિલ્મ-ઇન્ડસ્ટ્રીના નજીકના ફ્રેન્ડ્સ સાથે મનાવવાનો હોવાથી ૨૫૦ લોકોને ઇ​ન્વિટેશન મોકલવામાં આવ્યાં છે.

શાહરુખની આ બર્થ ડે પાર્ટીમાં દીપિકા પાદુકોણ, રાની મુખરજી, કાજોલ, કરીના કપૂર, સૈફ અલી ખાન, રણવીર સિંહ, કરિશ્મા કપૂર, ઝોયા અખ્તર, ફારાહ ખાન, શનાયા કપૂર, મહીપ કપૂર, શાલિની પાસી, નીલમ કોઠારી, કરણ જોહર અને આલિયા ભટ્ટ જેવી સેલિબ્રિટી સામેલ થઈ શકે છે. કહેવાય છે કે શાહરુખ ખાન પત્ની ગૌરી, ગૌરીની મમ્મી અને બાળકો સાથે એક પ્રાઇવેટ ડિનર પણ કરશે.

આ પાર્ટીમાં શાહરુખ ખાન તેની પુત્રી સુહાના ખાન સાથે પોતાની આગામી ફિલ્મ ‘કિંગ’ની અનાઉન્સમેન્ટ કરી શકે છે. અત્યારે શાહરુખ ખાન તેના સંતાન આર્યન ખાન અને સુહાના સાથે દુબઈમાં છે. આર્યને પિતા શાહરુખને દુબઈમાં એક પ્રી-બર્થ ડે પાર્ટી આપી હતી.