20 February, 2023 05:55 PM IST | Mumbai | Gujarati Mid-day Correspondent
શરદ કેળકર
શરદ કેળકરનું કહેવું છે કે લોકોએ છત્રપતિ શિવાજી મહારાજના આદર્શોને જીવનમાં ઉતારવા જોઈએ અને તેમના વારસાને જાળવી રાખવો જોઈએ. ‘તાન્હાજી : ધ અનસંગ વૉરિયર’માં છત્રપતિ શિવાજી મહારાજના રોલમાં શરદ દેખાયો હતો. ગઈ કાલે શિવાજી જયંતી નિમિત્તે તેમને યાદ કરતાં શરદ કેળકરે કહ્યું કે ‘બાળપણથી જ છત્રપતિ શિવાજી મહારાજ મારા માટે પ્રેરણાસ્રોત બન્યા છે. તેમનું જીવન તેમનો વારસો મને મોહિત કરે છે. આ મહાન ઐતિહાસિક વ્યક્તિ સાથે જોડાઈને હું ગર્વ અનુભવું છું. ‘તાન્હાજી : ધ અનસંગ વૉરિયર’માં છત્રપતિ શિવાજી મહારાજની ભૂમિકા ભજવવી એ મારા માટે સપનું પૂરું થવા સમાન છે. મોટી સ્ક્રીન પર તેમના જીવનને સાકાર કરવું મારા માટે સન્માનની વાત છે. શિવાજી જયંતી નિમિત્તે હું ખૂબ નજીકથી શિવાજી મહારાજ અને તેમનાં મૂલ્યો સાથે જોડાવાનો અનુભવ કરું છું. મારું એવું માનવું છે કે આપણે બધાએ તેમની લીડરશિપ, તેમના સાહસ અને પ્રજા પ્રત્યેના તેમના સમર્પણથી ઘણુંબધું શીખી શકીએ છીએ. આપણે શિવાજી જયંતી ઊજવીએ છીએ ત્યારે હું ચાહું છું કે આપણે બધા શિવાજી મહારાજ અને તેમના આદર્શોને જીવનમાં ઉતારીએ.’