05 September, 2023 05:43 PM IST | Mumbai | Gujarati Mid-day Correspondent
બૉબી દેઓલ
બૉબી દેઓલની વાઇફ તાન્યાની મમ્મી મેરલીન આહુજાનું લાંબી માંદગી બાદ રવિવારે અવસાન થયું છે. મેરલીનના પરિવારમાં તાન્યા ઉપરાંત વિક્રમા આહુજા અને મુનીષા આહુજા છે. દેઓલ પરિવાર હાલમાં ‘ગદર 2’ની સફળતાને માણી રહ્યો છે, પરંતુ એ સેલિબ્રેશનમાં મેરલીન તેમની નાજુક હાલતને કારણે સામેલ નહોતાં થયાં. તેમના નિધનથી પરિવારમાં શોક વ્યાપી ગયો છે. તાન્યાના સ્વર્ગીય પિતા દેવેન્દ્ર આહુજા મલ્ટિ-મિલ્યનેર બૅન્કર હતા. તેમણે 20th સેન્ચુરી ફાઇનૅન્સ કંપનીમાં મૅનેજિંગ ડિરેક્ટર તરીકે પણ કામગીરી બજાવી હતી. સની દેઓલના દીકરા રાજવીરની ફિલ્મ ‘દોનોં’ની ટ્રેલર-લૉન્ચ ઇવેન્ટ પહેલેથી નક્કી હોવાથી એ ઇવેન્ટને કન્ટિન્યુ રાખવી પડી હતી.
પ્રોડ્યુસર સાજિદ નડિયાદવાલાની ‘હાઉસફુલ 5’નું શૂટિંગ લંડનમાં કરવામાં આવશે. આ ફિલ્મનો પહેલો ભાગ ૨૦૧૦માં રિલીઝ થયો હતો. ભારતીય સિનેમાની આ પહેલી એવી ફ્રૅન્ચાઇઝી છે જેનો પાંચમો ભાગ બનવાનો છે. ‘હાઉસફુલ 5’ ૨૦૨૪ની દિવાળી દરમ્યાન રિલીઝ થવાની છે. આ ફિલ્મમાં અક્ષયકુમાર અને રિતેશ દેશમુખ પણ અન્ય કલાકારો સાથે જોવા મળશે. આ ફિલ્મ વિશે સાજિદ નડિયાદવાલાએ કહ્યું કે ‘ફિલ્મોની મારી જર્ની દરમ્યાન મેં હંમેશાં દર્શકોને ફિલ્મનો સારો અનુભવ આપ્યો છે. યુકે અને સાઉદી અરેબિયા સાથે અમારા સંબંધો સ્ટ્રૉન્ગ છે. અમારી ફિલ્મોનું શૂટિંગ અહીં કરીને અમને ઘર જેવો અનુભવ થાય છે. દર્શકોને ફિલ્મો દ્વારા મનોરંજન આપવું એ અમારો સ્ટ્રૉન્ગ ઉદ્દેશ છે. અમારી આગામી ફિલ્મ ‘હાઉસફુલ 5’ લોકોને અતિશય હસાવશે. ‘ચંદુ ચૅમ્પિયન’ પ્રેરણા આપશે અને ‘બાગી 4’ લોકોને આશ્ચર્યચકિત કરશે.’
સૈફ અલી ખાનની ૨૦૨૧માં આવેલી ‘ભૂત પોલીસ’ની સીક્વલ બને એવી ચર્ચા છે. એ ફિલ્મમાં અર્જુન કપૂર, યામી ગૌતમ અને જૅકલિન ફર્નાન્ડિસ પણ જોવા મળી હતી. એને પવન ક્રિપલાનીએ ડિરેક્ટ કરી હતી. હવે એની સીક્વલ બનવાની શક્યતા છે. જોકે એમાં કયા ઍક્ટર્સ હશે એ જાણવા નથી મળ્યું. 12th સ્ટ્રીટ એન્ટરટેઇનમેન્ટ એને પ્રોડ્યુસ કરશે. તેઓ અનેક પ્રોજેક્ટ્સ પર કામ કરી રહ્યા છે. તેમની ‘જાને જાં’ વિડિયો સ્ટ્રીમિંગ સર્વિસ નેટફ્લિક્સ પર એકવીસ સપ્ટેમ્બરે રિલીઝ થવાની છે. ગયા વર્ષે ‘ભૂત પોલીસ’ને લઈને સૈફ અલી ખાને જણાવ્યું હતું કે તેને એની સ્ક્રિપ્ટ અને તેનો રોલ પણ ખૂબ પસંદ પડ્યો હતો. સાથે જ તેણે હિન્ટ આપી હતી કે મેકર્સ આ ફિલ્મની સીક્વલ બનાવવા માટે પણ આતુર છે.
અમિતાભ બચ્ચન દર રવિવારે તેમના બંગલાની બહાર જમા થતા ફૅન્સને મળવા પહોંચી જાય છે. આ વખતે તેમનો દીકરો અભિષેક બચ્ચન પણ તેમની સાથે ઊભો હતો. અનેક વર્ષોથી અમિતાભ બચ્ચન તેમના ફૅન્સને મળીને તેમના પ્રત્યે આભાર વ્યક્ત કરે છે. તેમની એક ઝલક મેળવવા માટે દૂર-દૂરથી લોકો આવે છે. તેમનો આ એક નિયમ થઈ ગયો છે. આ મુલાકાતનો ફોટો અમિતાભ બચ્ચને બ્લૉગ પર શૅર કર્યો છે. એમાં તેઓ ફૅન્સને હાથ દેખાડીને તેમનું અભિવાદન ઝીલી રહ્યા છે. તો અન્ય ફોટોમાં અભિષેક બચ્ચનના ખભા પર અમિતાભ બચ્ચને હાથ રાખ્યો છે. આ ફોટોને બ્લૉગ પર શૅર કરીને અમિતાભ બચ્ચને લખ્યું કે ‘‘પિતા પુત્ર દોનોં ખડે, કાકે કરું પ્રણામ, જીવ દીન બાબુજી, કરેં ઉન્હેં સાષ્ટાંગ.’ સાષ્ટાંગ એટલે શરીરનાં આઠ અંગ જેમાં કપાળ, છાતી, ખભા, હાથ, પગ આખું શરીર નમન કરે છે.’
પ્રિયંકા ચોપડા જોનસ તેના હસબન્ડ નિક જોનસ સાથે તેની કૉન્સર્ટમાં સામેલ થવા નીકળી છે. નિક અમેરિકન સિંગર છે અને તેની પૉપ્યુલૅરિટી પણ ખૂબ છે. વિવિધ શહેરોમાં તેની મ્યુઝિકલ કૉન્સર્ટ ચાલતી હોય છે. તેની અમેરિકાના શહેર ઑસ્ટિનમાં કૉન્સર્ટ હતી. એથી હસબન્ડને ચિયર કરવા તે પણ પહોંચી ગઈ હતી. ઑસ્ટિનમાં જવાની જર્નીના ફોટો પ્રિયંકાએ શૅર કર્યા હતા. એ ફોટોમાં તે નિક સાથે ક્વૉલિટી ટાઇમ પસાર કરી રહી છે. પ્રિયંકાએ તેનો ફોટો પણ શૅર કર્યો છે. એ ફોટોમાં તેણે બ્લુ આઉટફિટ પહેર્યો છે અને ડાયમન્ડનાં ઇઅર-રિંગ પહેર્યાં છે. સાથે જ મેકઅપ તેણે ખૂબ ઓછો કર્યો છે. એ ફોટોને ઇન્સ્ટાસ્ટોરી પર શૅર કરીને પ્રિયંકાએ કૅપ્શન આપી હતી, આઇસ આઇસ બેબી.
શ્રદ્ધા કપૂરે મોટિવેશન મંત્ર આપ્યો હતો. પોતાના ફૅન્સને ફિટ ઍન્ડ ફાઇન રાખવાનું જણાવતાં તેમને યોગ કરવાની સલાહ આપી છે. તે પોતે પણ યોગ કરીને સ્વસ્થ રહે છે. શ્રદ્ધા હૉરર-કૉમેડી ‘સ્ત્રી 2’માં દેખાવાની છે. શ્રદ્ધાએ પોતાનો ફોટો શૅર કર્યો છે. એમાં તે યોગની મૅટ પર આરામ કરતી દેખાય છે. આ ફોટોને ઇન્સ્ટાગ્રામ પર શૅર કરીને શ્રદ્ધાએ કૅપ્શન આપી હતી, ‘બ્રુસ લીવાલા ઍટિટ્યુડ ચાહિએ? યોગ કરો.’