10 April, 2023 09:41 PM IST | Mumbai | Gujarati Mid-day Online Correspondent
તસવીર સૌજન્ય મિડ-ડે
સલમાન ખાન (Salman Khan) પોતાની નવી ફિલ્મ `કિસી કા ભાઈ કિસી કી જાન` સાથે ધમાલ મચાવવા માટે તૈયાર છે. ઘણાં સમયની રાહ જોયા બાદ ફિલ્મનું ટ્રેલર રિલીઝ થઈ ગયું છે અને આ ફિલ્મમાં તે બધા જ મસાલા છે, જે ભાઈજાનના ચાહકોને ગમે છે. રોમાન્સ, ડ્રામા અને એક્શનથી ભરપૂર આ ફિલ્મમાં સલમાન ખાન એક અલગ અવતારમાં જોવા મળશે. ફિલ્મમાં તેની લેડી લવ પૂજા હેગડે છે, જેની ક્યૂટનેસ પર ચાહકો પણ ફિદા છે.
અત્યાર સુધી ફિલ્મના મેકર્સે ગીત દ્વારા દર્શકોનો ઉત્સાહ વધાર્યો હતો. વેલેન્ટાઈન્સ ડે પર ફિલ્મનું પહેલું ગીત `નઈયો લગદા` રિલીઝ થયું હતું. ત્યાર બાદ `બિલ્લી બિલ્લી`, `જી રહે થે હમ (ફૉલિંગ ઈન લવ` આવ્યું. અને પછી સલમાન ખાને ફિલ્મના ફ્લેવરને જ બદલી નાખ્યો. `કિસી કા ભાઈ કિસી કી જાન`ના બે નવા ગીત Bahukamma અને Yentamma તેલુગૂ ભાષામાં છે. આ ગીતને જોઈને ચાહકો ખુશ તો છે જ પણ સાથે કન્ફ્યૂઝ પણ થયા. હવે ટ્રેલરમાં બધું જ સ્પષ્ટ થઈ ગયું છે.
કેવું છે `કિસી કા ભાઈ કિસી કી જાન`નું ટ્રેલર?
ટ્રેલરની શરૂઆત થાય છે સલમાન ખાન સાથે, જે જણાવે છે કે તેમનું કોઈ નામ નથી. લોકો તેને ભાઈજાનના નામે ઓળખે છે. ભાઈજાનના જીવનમાં આવે છે પૂજા હેગડે, જે ધીમે-ધીમે તેના પ્રેમમાં પડે છે. પૂજા ભાઈજાનને પોતાના ભાઈ વેંકટેશને મળાવે છે, જેને હિંસા પસંદ નથી. પણ વેંકટેશના જીવનમાં એક વિલન છે, જે તેને અને તેના પરિવારને ખતમ કરવાના પ્રયત્નમાં લાગેલ છે. એવામાં ભાઈજાન જ પોતાની લેડીલવ અને તેના પરિવારને બચાવતા જોવા મળશે. અહીં સલમાન ખાન, વિલન બનેલા એક્ટર જગપતિ બાબૂ અને વિજેન્દ્ર સિંહના હાડકાં ભાંગવા અને હથોડાંથી તેના ગુંડાને ફટકારતા જોવા મળશે.
સલમાન ખાન ફરી એકવાર સ્વેગ અને એક્શનથી ભરપૂર અવતારમાં મોટા પડદા પર કમબૅક કરી રહ્યો છે. પોતાની જ સ્ટાઈલમાં તે રોમાન્સ પણ કરશે. ટ્રેલર પરથી સ્પષ્ટ થઈ જાય છે કે `કિસી કા ભાઈ કિસી કી જાન` જબરજસ્ત મસાલા એન્ટરટેઈનર ફિલ્મ હશે, જે સલમાનના ચાહકોને ખુશ કરી દેશે.
ટ્રેલર જોઈને વધ્યો ચાહકોનો જોશ
આ ધમાકેદાર ટ્રેલર જોયા બાદ ચાહકોનું દિલ ખુશ થઈ ગયું છે. ચાહકોનું કહેવું છે કે આ ફિલ્મ બૉક્સ ઑફિસ પર ધૂમ મચાવવાની છે. સાથે જ સલમાન ખાનના એક્શન સીન્સ બધાને અચંબિત કરનારા છે. સલમાનના એક મુક્કામાં બિલ્ડિંગ પાડી દેનારો સીન તો વાયરલ થઈ જ ગયો છે.
આ પણ વાંચો : ભારે સુરક્ષા સાથે KKBKKJનું ટ્રેલર લૉન્ચ
ફિલ્મ `કિસી કા ભાઈ કિસી કી જાન`ના નિર્દેશન ફરહાદ સામજી છે. સલમાન ખાન આ ફિલ્મના પ્રૉડ્યૂસર છે. ફિલ્મમાં સલમાન ખાન, પૂજા હેગડે, સિદ્ધાર્થ નિગમ, શેહનાઝ ગિલ, સાઉથ સ્ટાર વેંકટેશ, જગપતિ બાબૂ, જસ્સી ગિલ અને પલક તિવારી જેવા સ્ટાર્સ કામ કરી રહ્યા છે. આ ફિલ્મ 21 એપ્રિલ 2023ના રોજ રિલીઝ થવાની છે.