બેચારા આમિર ખાન : કંગના

શોભા ડેની બાયોપિક માટે તેના નામનો ઉલ્લેખ આમિરે ન કરતાં આવું કહ્યું

કંગના રનોટ

ઓથર શોભા ડેની બુક ‘ઇન્સેશિએબલ’ના લૉન્ચ વખતે આમિર ખાન હાજર હતો. એ વખતે શોભાએ તેને પૂછ્યું કે જો મારી બાયોપિક બને તો એ રોલ માટે કોણ પર્ફેક્ટ હશે. એનો જવાબ આપતાં આમિરે કહ્યું કે ‘દીપિકા પાદુકોણ, પ્રિયંકા ચોપડા જોનસ અને આલિયા ભટ્ટ.’ 

જોકે શોભા ડેએ તેને કંગના રનોટનું નામ સૂચવ્યું હતું. એના પર રીઍક્ટ કરતાં આમિરે કહ્યું કે ‘હા, તે પણ આ રોલ સારી રીતે કરી શકે છે. કંગના સારી રીતે પાત્ર ભજવશે. તે એક સ્ટ્રૉન્ગ ઍક્ટર છે, તે વર્સેટાઇલ છે.’

આ પણ વાંચો: ઘર મેં ઘુસ કે મારુંગી : કંગના

બાયોપિક માટે પોતાના નામનો ઉલ્લેખ ન કરતાં કંગનાએ આમિરનો ઊધડો લીધો હતો. ટ્વિટર પર કંગનાએ ટ્વીટ કર્યું હતું, ‘બેચારા આમિર ખાન. તેણે સારોએવો ડોળ કર્યો કે તેને જાણ જ નથી કે હું એકમાત્ર ત્રણ વખત નૅશનલ અવૉર્ડ જીતનારી ઍક્ટ્રેસ છું અને જેનાં તેણે નામ લીધાં છે એમાંથી કોઈ એક નૅશનલ અવૉર્ડ પણ નથી જીત્યું. થૅન્ક યુ શોભાજી. તમારી ભૂમિકા ભજવવાનું મને ગમશે. શોભાજી અને મારા વિચારોમાં વિરોધાભાસ હશે, પરંતુ એ તેમને મારી કળા, મારી સખત મહેનત અને કામ પ્રત્યેના મારા સમર્પણની પ્રશંસા કરતાં નહીં અટકાવી શકે. મારું કામ મારી પ્રામાણિકતા અને આદર્શોનું પ્રતિબિંબ છે. તમારી નવી બુક માટે મૅમ તમને શુભેચ્છા. સૉરી, મારી પાસે ચાર નૅશનલ અવૉર્ડ છે અને મારા ફૅન્સે મને યાદ અપાવ્યું છે કે મને પદ્‍મશ્રી પણ મળ્યો છે. કેટલા અવૉર્ડ મળ્યા છે એ પણ મને યાદ નથી.’