18 May, 2024 09:50 PM IST | Mumbai | Gujarati Mid-day Online Correspondent
ફાઇલ તસવીર
કાર્તિક આર્યનની બહુપ્રતિક્ષિત ફિલ્મ `ચંદુ ચેમ્પિયન’ (Chandu Champion Trailer)નું ટ્રેલર રિલીઝ કરવામાં આવ્યું છે. એક્ટરનો ફર્સ્ટ લૂક જોઈને લોકો ફિલ્મના ટ્રેલરની આતુરતાથી રાહ જોઈ રહ્યા હતા, જે હવે પૂરી થઈ ગઈ છે. `ચંદુ ચેમ્પિયન`નું ટ્રેલર રિલીઝ થઈ ગયું છે. કબીર ખાનના નિર્દેશનમાં બનેલી કાર્તિક આર્યન (Kartik Aaryan)ની ફિલ્મ `ચંદુ ચેમ્પિયન`નું ટ્રેલર 18 મે, શનિવારે રિલીઝ કરવામાં આવ્યું છે. ફિલ્મના ટ્રેલરને ખૂબ પસંદ કરવામાં આવી રહ્યું છે.
ફિલ્મના ટ્રેલર (Chandu Champion Trailer)માં કાર્તિક આર્યનની એક્ટિંગ એક સમયે લોકોના દિલ જીતી ચુકી છે. ટ્રેલર લાગણીઓ, એક્શન અને અત્યાર સુધીના સૌથી મોટા યુદ્ધ ક્રમની ઝલકથી ભરપૂર છે, જેમાં કેટલીક હ્રદયસ્પર્શી ક્ષણો સાથે એવા માણસની પ્રેરણાદાયી યાત્રા છે જે ક્યારેય હાર માનતો નથી.
કેવું છે ફિલ્મનું ટ્રેલર?
કાર્તિક આર્યનની ફિલ્મ `ચંદુ ચેમ્પિયન` (Chandu Champion Trailer)નું ધમાકેદાર ટ્રેલર રિલીઝ થઈ ગયું છે. ટ્રેલરમાં બતાવવામાં આવ્યું છે કે 1965ના યુદ્ધમાં ચંદુને 9 ગોળીઓ વાગી હતી અને તે કોમામાં ચાલ્યો ગયો હતો. આ પછી, ચંદુના બાળપણની વાર્તા બતાવવામાં આવી છે જ્યાં તે ચેમ્પિયન બનીને મેડલ લાવવા માગે છે, પરંતુ ચંદુના બાળપણમાં તેની ખૂબ મજાક કરવામાં આવે છે અને તેને ઘણા સંઘર્ષનો સામનો કરવો પડે છે. ચેમ્પિયન બનવાનું સપનું જોનાર મુરલીકાંત કેવી રીતે ગોલ્ડ મેડલિસ્ટમાંથી આર્મી ઓફિસર બન્યો તેની વાર્તા ફિલ્મની વાર્તા છે.
કોણ છે મુરલીકાંત પેટકર?
મુરલીકાંત પેટકર ભારતના પ્રથમ પેરાલિમ્પિક સુવર્ણ ચંદ્રક વિજેતા છે. તેણે 50 મીટર ફ્રી સ્ટાઇલ સ્વિમિંગ સ્પર્ધામાં 37.33 સેકન્ડનો વર્લ્ડ રેકોર્ડ બનાવ્યો હતો. તેમને પદ્મશ્રીથી પણ નવાજવામાં આવ્યા છે. તેને માત્ર બોક્સિંગમાં જ નહીં પરંતુ સ્વિમિંગ અને ટેબલ ટેનિસ જેવી રમતોમાં પણ ખૂબ રસ હતો.
ફિલ્મ ક્યારે રિલીઝ થશે?
સાજિદ નડિયાદવાલા અને કબીર ખાન દ્વારા સહ-નિર્મિત `ચંદુ ચેમ્પિયન` 14 જૂન, 2024 ના રોજ થિયેટરોમાં રિલીઝ થશે, જ્યારે વર્ક ફ્રન્ટ પર, કાર્તિક ટૂંક સમયમાં `ભૂલ ભૂલૈયા 3` માં જોવા મળશે. આ ફિલ્મમાં તેની સાથે તૃપ્તિ ડિમરી અને વિદ્યા બાલન જોવા મળશે. આ ફિલ્મનું નિર્દેશન અનીસ બઝમી કરી રહ્યા છે.
કાર્તિકે કોઈ પણ સ્ટેરૉઇડ્સ વગર બૉડી દોઢ વર્ષમાં બનાવી હતી
કાર્તિક આર્યનની ‘ચંદુ ચૅમ્પિયન’ના લુકનાં વખાણ થતાં ફિલ્મના ડિરેક્ટર કબીર ખાને આ પાછળની સ્ટોરી જણાવી છે. આ એક બાયોપિક છે જેમાં કાર્તિક એક નહીં, પરંતુ ઘણી સ્પોર્ટ્સ રમતો જોવા મળી રહ્યો છે. આ વિશે વાત કરતાં કબીર ખાન કહે છે, ‘અમારી ‘ચંદુ ચૅમ્પિયન’ની સ્ટોરી ખૂબ જ પ્રેરણાત્મક છે અને કાર્તિક જે રીતે ચૅમ્પિયન બન્યો છે એ પણ ઇન્સ્પાયરિંગ છે. તેણે એક પાત્ર માટે વજન વધાર્યું હતું ત્યારે હું તેને મળ્યો હતો. એ સમયે તેની બૉડી ફૅટ ૩૯ ટકા હતી. દોઢ વર્ષ બાદ તે જ્યારે મારી પાસે આવ્યો ત્યારે તેની બૉડી ફૅટ ફક્ત સાત ટકા હતી. તેણે કોઈ પણ સ્ટેરૉઇડ્સનો ઉપયોગ નહોતો કર્યો. કાર્તિક, મને તારા પર ગર્વ છે.’