`Rocky Aur Rani Kii Prem Kahani`નું ટીઝર કરશે પ્રેમમાં તરબોળ, જુઓ આલિયા-રણવીરનો પ્રેમ

રણવીર સિંહ અને આલિયા ભટ્ટ

બૉલિવૂડ (Bollywood)માં રૉમેન્સના બાદશાહ કહેવાતા દિગ્દર્શક કરણ જોહર (Karan Johar)ની ફિલ્મો જોવા માટે દર્શકો ઉત્સાહિત હોય છે. આ જ કારણ છે કે કરણ જોહરની આગામી ફિલ્મ `રૉકી ઔર રાની કી પ્રેમ કહાની` (Rocky Aur Rani Kii Prem Kahani)ની આતુરતાથી રાહ જોવાઈ રહી છે.જ્યારથી આલિયા ભટ્ટ (Alia Bhatt) અને રણવીર સિંહ (Ranveer Singh) સ્ટારર ફિલ્મની જાહેરાત થઈ છે ત્યારથી લોકો તેની પહેલી ઝલક મેળવવા માટે ઉત્સુક છે અને આજે આખરે ફિલ્મ `રૉકી ઔર રાની કી પ્રેમ કહાની`નું ટીઝર રિલીઝ કરવામાં આવ્યું છે. આ ફિલ્મ દ્વારા કરણ જોહર ૧૩ વર્ષ બાદ દિગ્દર્શનની દુનિયામાં ફરી પાછા પ્રવેશ્યા છે. ૨૮ જુલાઈના રોજ રિલિઝ થનારી ફિલ્મ `રૉકી ઔર રાની કી પ્રેમ કહાની` દર્શકોમાં અનેરો ઉત્સાહ જોવા મળી રહ્યો છે.

કરણ જોહરની ફિલ્મ `રૉકી ઔર રાની કી પ્રેમ કહાની`નું ટીઝર મંગળવારે રિલીઝ કરવામાં આવ્યું છે, જેને ખૂબ પસંદ કરવામાં આવી રહ્યું છે. આ ટીઝરમાં રણવીર સિંહ અને આલિયા ફરી એકવાર પોતાની સિઝલિંગ કેમેસ્ટ્રીથી દર્શકોના દિલ જીતી રહ્યાં છે.

અહીં જુઓ `રૉકી ઔર રાની કી પ્રેમ કહાની`નું ટીઝર :

ટીઝરમાં શિફોન સાડીમાં આલિયા ભટ્ટે ૯૦ના દાયકાની હિરોઈનોની યાદ અપાવી છે. તો રણવીર સિંહ પણ તેની એક્ટિંગ અને ડાન્સ મૂવ્સથી લોકોને પ્રભાવિત કરવામાં સફળ રહ્યો છે. રોમાન્સથી લઈને ફેમિલી ડ્રામા સુધી દરેક બાબત આ ફિલ્મમાં જોવા મળશે તે ટીઝર પરથી ખબર પડે છે. ફિલ્મ એક કમ્પલિટ એન્ટરટેઈનર છે તેની સાબિતી આપે છે આજે રિલીઝ થયેલું ફિલ્મ `રૉકી ઔર રાની કી પ્રેમ કહાની`નું ટીઝર.

ફિલ્મ `રૉકી ઔર રાની કી પ્રેમ કહાની` ટીઝરમાં દેખાતા દ્રશ્યો ક્યારેક દીપિકા પાદુકોણ (Deepika Padukone) અને રણવીર સિંહની ફિલ્મ રામ-લીલા (Ram-Leela)ની ઝલક આપે છે તો ક્યારેક એવું લાગે છે કે `કભી ખુશી કભી ગમ` (Kabhi Khushi Kabhie Gham)નું કોઈ દ્રશ્ય છે. એટલું જ નહીં, રણવીર સિંહ અને આલિયા ભટ્ટના ઘણા રોમેન્ટિક સીન્સ શાહરૂખ ખાન (Shah Rukh Khan) અને કાજોલ (Kajol)ના રોમેન્ટિક સીન્સની યાદ અપાવે છે. અલબત્ત આ ફિલ્મ એક રોમેન્ટિક ડ્રામા જેવી લાગે છે. જો કે હજુ સુધી ટીઝરમાંથી વાર્તાની કોઈ ઝલક જોવા મળી નથી. પરંતુ એ સમજી શકાય છે કે કરણ જોહર ફરી એકવાર રોમાન્સ અને લાગણીઓનો મસાલો લઈને આવી રહ્યો છે. પરંતુ ટીઝર જોઈને નવીનતાનો અભાવ સ્પષ્ટ દેખાય છે.

આલિયા ભટ્ટ અને રણવીર સિંહ સ્ટારર ફિલ્મ `રૉકી ઔર રાની કી પ્રેમ કહાની` ૨૮ જુલાઈ ૨૦૨૩ના રોજ સિનેમાઘરોમાં રિલીઝ થશે. ફિલ્મમાં રાનીની ભૂમિકામાં આલિયા ભટ્ટ અને રોકીની ભૂમિકામાં રણવીર સિંહ છે. તે ઉપરાંત ધર્મેન્દ્ર (Dharmendra), શબાના આઝમી (Shabana Azmi), જયા બચ્ચન (Jaya Bachchan) અને અંજલિ આનંદ (Anjali Anand) પણ ફિલ્મમાં મુખ્ય ભૂમિકામાં જોવા મળશે. આ ફિલ્મનું દિગ્દર્શન કરણ જોહર (Karan Johar)એ કર્યું છે. સૈફ અલી ખાન (Saif Ali Khan)નો પુત્ર ઈબ્રાહિમ અલી ખાન (Ibrahim Ali Khan) આ ફિલ્મથી આસિસ્ટન્ટ ડિરેક્ટર તરીકે બૉલિવૂડમાં ડેબ્યૂ કરી રહ્યો છે.