07 September, 2022 04:27 PM IST | Mumbai | Gujarati Mid-day Online Correspondent
લાલ સિંહ ચઢ્ઢા ફિલ્મમાં આમિર અને કરીના કપૂર
બૉલિવૂડ એક્ટર આમિર ખાન (Aamir Khan) અને તેની ફિલ્મ `લાલ સિંહ ચઢ્ઢા` લાંબા સમયથી સતત ચર્ચામાં છે. જ્યારે ફિલ્મ અને કલાકારો તેના વિરોધને કારણે રિલીઝ પહેલા જ ચર્ચામાં હતા, ત્યારે તેના નબળા પ્રદર્શનને કારણે ફિલ્મને રિલીઝ થયા બાદ ભારે નુકસાન સહન કરવું પડ્યું હતું. ભારે વિરોધનો સામનો કરી રહેલી આ ફિલ્મને દર્શકોએ સદંતર નકારી કાઢી હતી. આવી સ્થિતિમાં અપેક્ષા મુજબ કમાણી મળી નથી. લાલ સિંહ ચઢ્ઢા ફિલ્મના નબળા પ્રદર્શનને કારણે આમિર ખાનની કારકિર્દીની બીજી મોટી ફ્લોપ સાબિત થઈ છે.
ફિલ્મના ખરાબ પ્રદર્શનને કારણે ફિલ્મના નિર્માતાઓને ભારે નુકસાન સહન કરવું પડ્યું હતું. આવી સ્થિતિમાં હવે ફિલ્મના નિર્માતાઓ પાસે કમાણીનો બીજો સ્ત્રોત બચ્યો છે. સિનેમાઘરો બાદ હવે આ ફિલ્મ ટૂંક સમયમાં OTT પર રિલીઝ થવા જઈ રહી છે. ઘણા સમયથી ફિલ્મની ડિજિટલ રિલીઝને લઈને અનેક પ્રકારના સમાચારો સામે આવી રહ્યા હતા. આ સાથે એવી માહિતી પણ સામે આવી છે કે આ ફિલ્મ દિવાળીની આસપાસ OTT પર રિલીઝ થશે.
આ દરમિયાન હવે ફિલ્મની OTT રિલીઝને લઈને નવીનતમ અપડેટ બહાર આવી છે. તાજેતરમાં મળેલી માહિતી અનુસાર આમિર ખાનની `લાલ સિંહ ચઢ્ઢા` 20 ઓક્ટોબરે OTT પર રિલીઝ થશે. જે લોકો આ ફિલ્મને થિયેટરોમાં જોઈ શક્યા નથી, તે 20 ઓક્ટોબરથી નેટફ્લિક્સ પર સ્ટ્રીમ થશે. એટલે કે થિયેટરોમાં રિલીઝ થયાના બે મહિના બાદ હવે આ ફિલ્મ OTT પર પણ હાજર થશે.
રિપોર્ટ્સ અનુસાર, આમિર ખાન લગભગ 150 કરોડ રૂપિયાની માંગ કરી રહ્યો હતો. જોકે, નેટફ્લિક્સે આ ડીલ લગભગ 80-90 કરોડ રૂપિયાની ઓછી કિંમતે કરી હતી.
ફિલ્મની વાત કરીએ તો 180 કરોડના બજેટમાં બનેલી આ લાલ સિંહ ચઢ્ઢા બોક્સ ઓફિસ પર ખરાબ રીતે પીટાઈ ગઈ હતી. ફિલ્મ અપેક્ષા મુજબનું પ્રદર્શન કરી શકી નથી. હોલીવુડ ફિલ્મ ફોરેસ્ટ ગમ્પની ઓફિશિયલ રીમેક આ ફિલ્મમાં આમિર ઉપરાંત અભિનેત્રી કરીના કપૂર, મોના સિંહ અને દક્ષિણ અભિનેતા નાગા ચૈતન્ય પણ જોવા મળ્યા હતા.