NSEનાં કુલ ક્લાયન્ટ્સ-અકાઉન્ટ્સની સંખ્યા ૨૦ કરોડને પાર આઠ મહિનામાં ત્રણ કરોડ નવાં અકાઉન્ટ્સ ઉમેરાયાં

NSEના ચીફ બિઝનેસ ડેવલપમેન્ટ ઑફિસર શ્રીરામ કૃષ્ણને કહ્યું છે કે ‘માત્ર આઠ મહિનામાં અમારા ઇન્વેસ્ટર બેઝમાં લગભગ ત્રણ કરોડનો વધારો થયો છે. આ અદ્ભુત વૃદ્ધિ ભારતના વિકાસમાં રોકાણકારોના વધેલા વિશ્વાસનું પ્રતિબિંબ છે.

નૅશનલ સ્ટૉક એક્સચેન્જ

નૅશનલ સ્ટૉક એક્સચેન્જ ઑફ ઇન્ડિયા (NSE)એ પ્રાપ્ત કરેલી એક મહત્ત્વપૂર્ણ સિદ્ધિમાં એનાં ક્લાયન્ટ્સ-અકાઉન્ટ્સની સંખ્યા ઑક્ટોબર મહિનામાં વીસ કરોડનો આંકડો વટાવી ગઈ છે. આ સિદ્ધિ વિશે પ્રતિક્રિયા વ્યક્ત કરતાં NSEના ચીફ બિઝનેસ ડેવલપમેન્ટ ઑફિસર શ્રીરામ કૃષ્ણને કહ્યું છે કે ‘માત્ર આઠ મહિનામાં અમારા ઇન્વેસ્ટર બેઝમાં લગભગ ત્રણ કરોડનો વધારો થયો છે. આ અદ્ભુત વૃદ્ધિ ભારતના વિકાસમાં રોકાણકારોના વધેલા વિશ્વાસનું પ્રતિબિંબ છે. ડિજિટલાઇઝેશન, ટેક્નૉલૉજીમાં ઇનોવેશન, મોબાઇલ ટ્રેડિંગ ઍપ્લિકેશન અને રોકાણકારોમાં વધેલી જાગૃતિનું પણ આ પરિણામ છે. આ કારણે બધાને બજાર સમાનરૂપે ઉપલબ્ધ બને છે, ખાસ કરીને નાનાં-મધ્યમ કદનાં શહેરોમાં પણ આ બેઝ વધી રહ્યો છે. આ વિસ્તરણને સરળ KYCની પ્રક્રિયા, નાણાકીય શિક્ષણના કાર્યક્રમો અને બજારના પૉઝિટિવ સેન્ટિમેન્ટે પણ ટેકો પૂરો પાડ્યો છે.’ 

રાજ્યવાર સ્થિતિ

માત્ર આઠ જ મહિનામાં ક્લાયન્ટ્સ-અકાઉન્ટ્સની સંખ્યા ૧૬.૯ કરોડ પરથી વધીને વીસ કરોડની થઈ છે, જેમાં હાલ રાજ્યવાર સ્થિતિ જોઈએ તો સૌથી અધિક અકાઉન્ટ્સ મહારાષ્ટ્રમાં ૩.૬ કરોડ છે; જ્યારે ઉત્તર પ્રદેશમાં ૨.૨ કરોડ, ગુજરાતમાં ૧.૮ કરોડ, રાજસ્થાનમાં અને બંગાળ પ્રત્યેકમાં ૧.૨ કરોડ અકાઉન્ટ્સ થયાં છે. આ રાજ્યો કુલ ક્લાયન્ટ્સ-અકાઉન્ટ્સના આશરે પચાસ ટકા ધરાવે છે, જ્યારે ટોચનાં દસ રાજ્યો કુલ સંખ્યાનો ત્રણ ચતુર્થાંશ હિસ્સો ધરાવે છે. વધુમાં યુનિક રજિસ્ટર્ડ ઇન્વેસ્ટર્સની સંખ્યા ૧૦.૫ કરોડની થઈ છે જે ૨૦૨૪ની ૮ ઑગસ્ટે દસ કરોડની હતી.